【陳卓賢拍MV化身黑馬王子】陳卓賢Ian形容，跟《留一天與你喘息》相比，《Got U》是一直白情歌，他說：「其實《留一天與你喘息》我唔係好當佢係情歌，因為好多時候，擺喺唔同對象，好似朋友、家人、身邊所有人，甚至是寵物都啱用，但《Got U》就係好直白嘅甜蜜情歌，直接話俾對方聽，因為有你，所有問題都解決晒。」今次Ian繼續負責作曲部份，並首度與填詞人T-Rexx合作。「向來唔係自己填詞嘅作品，就會同填詞人溝通好多，然後大家就會揮筆寫一份好好嘅詞出嚟，今次同T-Rexx第一次合作，但都幾一見如故，好直接溝通到（歌曲）會係乜嘢嘅感覺，當中有啲乜嘢密碼藏喺入面，所以今次合作都好開心。」
《Got U》MV：https://youtu.be/OPjzNxGwnYo
《Got U》的歌詞甜到漏，但今次MV的故事卻十分傷感：講述女主角因眼疾，與Ian的甜蜜溫馨逐漸從幸福的日常中漸漸流走，但Ian卻覺得導演構思了這個傷感的故事，卻十分合理，他說：「人生不如意事十常八九，淨返一二就係開心事，正正因為有傷感嘅事，當有令你好開心或者好難得嘅事情出現時先特別顯得珍貴，而每一樣好開心嘅事嘅背後都一定有好長篇嘅故事，例如：一對情侶走到白頭到老背後都經歷好多，甚或有好多爭執、唔愉快嘅事。每一個美好故事背後，都一定有個傷感啲、現實啲嘅背景，所以MV劇情好合理。」
MV中，為了呈現一對情侶的甜蜜溫馨畫面，Ian有機會首嘗騎馬的滋味，穿上黑色牛仔褸的他，騎上馬背即化身「黑馬王子」，型格帥氣兼備，而Ian自己拍攝當日也騎得十分開心，瞬間變大細路！他開懷道：「第一次騎馬，好開心又好玩，希望以後MV都會有多啲唔同類型嘅活動！因為我放假空餘時間，都應該唔會喺bucket list有想學騎馬呢個想法，但導演話今次要騎馬時我係好開心，我好想試下。今日拍攝可以將一啲平時唔會做到，但原來我都好想做嘅事做到出嚟，所以好開心。不過騎馬開心得滯，掛住望隻馬唔記得望女主角，結果導演要不停提住我，要對望；但都好開心，仲要幫隻馬沖涼，正！」其實拍攝當日正值暴風雨前夕，氣溫逾30度，但另一甜蜜場口則讓Ian與女主角可以在天台的水池中玩樂，透心涼一番，但Ian笑指：「都舒服嘅，落去嗰下涼浸浸，但真係坐落去嗰下又怪怪地，可能因為知道自己著住便服，然後著住正常內褲，如果著住泳褲加沙灘褲，成件事就好啱數。Physically（肉體上）又唔係好唔舒服，只係心理上覺得唔係著住一件好Appropriate（合適）嘅衫褲，但熱辣辣浸住水食下西瓜幾爽。」
至於另一場景，只見Ian手執咪高峰，與女主角在鏡頭前忘形高歌，不過MV中卻未有聽到Ian在唱甚麼，相信很多粉絲都會即時猜想歌曲名字，Ian即給予點點提示，讓大家估一下，他道：「唱呢隻歌係因為近期睇咗一套電影，電影裡面有出現呢隻歌，當導演話要我唱一隻歌氹女主角開心，要成個人好開心好有氣氛嘅時候，腦內第一時間就Pop Up（彈出）呢隻歌。係一位好敬佩嘅藝人前輩作品，所以第一時間就諗到，同時亦係向呢位前輩致敬，我自己都好鍾意呢隻歌，細細個就聽㗎喇！」憑藉Ian的提示，大家又估到了嗎？
#陳卓賢 #ianchan #gotu #mirrorweare
#香港音樂人 #香港製造 #makeinhongkong
#香港人撐香港音樂 #撐廣東歌撐谷Live #香港音樂
#2022廣東歌 #新歌
----------------------------------------------
👍🏻 Facebook：https://bit.ly/2HZAgDL
♥️ IG：https://bit.ly/34PhuYx
⭕ YouTube：http://www.youtube.com/c/谷Live
🏆 谷撐音樂流行榜：https://bit.ly/3q6yB0l
留言 0