陳庭欣短裙晒腿搶Fo　自認有偷睇姜濤打波

藝人陳庭欣（Toby）今日現身劇集《非常檢控觀》宣傳活動，以貼身短裙上陣的她大騷美腿，她透露在劇中其中一個單元飾演拍賣官，其中一幕在荒山野嶺拍攝：「同我一齊拍嘅Yuki（羅毓儀）事後同我講話見到嘢，嗰度都幾偏僻，加上個場口有啲血淋淋，當時咁啱係蔡天鳳案嗰期，劇情有少少相似，所以拍攝時都有啲心寒。」

另外，講到Toby近日在社交網分享打匹克球的照片，相中竟見MIRROR人氣王姜濤目不轉睛看她打球，她解釋大家只是在同一場地打波：「佢唔係睇我，佢當時應該係休息中，我反而有偷睇佢打波，佢打過2、3次，但打得唔錯。我冇同佢打過波，佢嗰隊已經夠人。我有同ERROR嘅肥仔打過，過程好開心。我記得影相當日係肥仔生日，大家買咗個蛋糕同佢慶祝。（你有冇同姜濤集郵？）唔會，我個妝又甩晒。（你甫咗姜濤張相，怕唔怕佢介意？）我初時冇為意張相有佢，我只係轉發，相信佢唔會為咁小事介意。」她大讚匹克球是很神奇的運動，可以將不同的人聚在一起。

東網網站 : https://on.cc/東網Facebook專頁 : https://www.facebook.com/onccnews/