劉亦菲停滯兩年原因曝光　企硬一條件嚇怕投資方

內地女星劉亦菲久未推出新作，自2023年底拍完話題內地劇《玫瑰的故事》後，一直都冇工開，雖然早前有指佢稍後將進組二搭男神李現開拍新劇，氹得一班CP粉絲勁開心。惟有內地媒體分析，並非戲約不足，而係佢對劇本品質與合作條件有高度堅持，令多個合作案遲遲無法拍板。

據知劉亦菲目前電視劇片酬已站上市場頂格，單部開價約5,000萬人民幣（約5,655萬港元），且態度明確唔會降價，於現今影視市場資金緊縮、製作預算普遍下修情況下，能同時符合其條件與市場現實嘅項目相對有限，唔少原本洽談中嘅合作，最終因預算考量而告吹。

網上同時流出一份「未進組演員天數排行」，其中排名第二嘅劉亦菲，雖然於2023年同霍建華合作《玫瑰的故事》後，收視與話題表現亮眼，帶動多項品牌聯名合作，然而戲劇播畢後，佢不僅未接拍新作，又鮮少公開露面。劉亦菲就表示自己唔追求作品數量，更在意角色是否能帶嚟新鮮感與創作刺激，寧願等真正合適嘅劇本，都唔願為維持曝光而勉強進組。

其實，劉亦菲並非完全冇戲約，有指《去有風的地方》第二季、《咸雪》以及《宴三合》等作品都曾傳出向佢遞出邀約：《去有風的地方》第一季有人氣，若原班人腳回歸，已被看好再創話題；《咸雪》由名導李路操刀；《宴三合》則主打懸疑推理與情感救贖題材，話題性十足，但截至目前皆未正式定案。

東網網站 : https://on.cc/東網Facebook專頁 : https://www.facebook.com/onccnews/