譚耀文子女獲讚文武雙全︰都係各位畀面啫

譚耀文、姚樂怡日前接受HOY TV主播俞詠文訪問，分享拍攝新戲《拼命三郎》的苦與樂。飾演退休江湖大佬的譚耀文拍攝時人如戲名，他表示︰「拍呢套片嘅時候係疫情差唔多完結嘅時間，大家都經歷咗兩年幾身心疲累，所以就將呢種情緒放入角色，又覺得幾適合喎！我同角色有啲似，感覺到有啲中年危機。打戲方面，我有少少研究，即係例如甄子丹、李小龍係點樣打？我冇佢哋咁有型，都希望做到一半啦！」

除了打戲，譚耀文在片中有多場激烈吵架場面，他回味着說：「有幾場我同Mark哥（鄭浩南），仲有『前妻』樂怡嘅嗌交同打交戲，都好激烈吓！我同佢喺辦公室嗌交嗰場，當中七成以上嘅對白都係即場發揮；而同樂怡嗰場嗌交戲，印象都非常深刻。樂怡當時嘅狀態同保養都非常好，做對手戲嘅時候感覺好真實，同埋嗰段戲係好有睇頭嘅！」

《拼命三郎》除了有兩位淡出江湖兄弟的戲碼之外，亦有講述譚耀文和飾演其兒子林家熙（Locker），以及與飾演前妻的姚樂怡的感情場面。姚樂怡表示《拼命三郎》是探討兩代的關係，亦因為這個原因，他們在現實中的家庭生活亦引起熱話。譚耀文一對子女被譽為文武雙全，他說：「都係各位畀面啫，連學費幾多都要攞埋出嚟講，真係多謝晒！哈哈！好彩學校嘅校長係外國人，應該唔識睇！」姚樂怡表示現年9歲的女兒未到反叛期︰「佢有駁嘴駁舌，但未到夠膽閂房門唔睬你！佢仲係同我一齊瞓覺㗎，我仍然享受緊呢種咁親密嘅過程！我自己都好後期至反叛，18歲先可以一個人出街。我覺得依家社會唔同咗，同下一代相處最好好似朋友咁。」

（即時娛樂）