孔德賢「美男計」冧掂街市姐姐 戴祖儀化身講價達人

合共3集的旅遊節目《玩轉澳門加倍Fun》由「後生仔」班底包括陸浩明（6號）、游嘉欣（游游）、孔德賢（Danny）及戴祖儀（Joey）主持，齊齊玩轉澳門。

今晚（26日）播出一集，4位主持除了去到典當業展示館、最新公仔打卡位、茶酒crossover的特色茶室外，還應付製作組突如其來的「盲盒式」埋單，更挑戰100元內買最多種類小食！

今集Joey一度主動埋單，事緣4人到新加坡餐廳歎美食時，Joey品嘗炸雞髀配椰漿飯時突然思鄉，父親是馬來西亞人的Joey說：「我好多年冇返去，都會搵啲東南亞嘅嘢食。」當品嘗到咖央多士時，Joey即豪邁高呼：「好啦，呢一餐我決定唔玩遊戲啦，直接我畀錢，好食嘅嘢真係令到你全日心情非常愉快，今日你哋講咩，我都唔會嬲㗎啦！」6號即慫恿大家，一人講一句激嬲戴祖儀的說話。

「Budget限定買小食」挑戰，游游孖住Danny嘗試以「美色」講價，Danny獲街市姐姐大讚靚仔，成功殺價！另一隊Joey、6號也不遑多讓，2人化身「講價達人」，殺價度高達25％，當中尤以6號最狼死，40元壓價至30蚊，令Joey讚歎不已：「我好欣賞你劈價，可唔可以以後shopping都搵你？」Joey竟只用了40元買齊榴槤、香印提子、蜜瓜、藍莓等水果。

（即時娛樂）