陳奕迅囡囡陳康堤大個女做歌手入行　首次MV拍攝感焦慮

早前華納唱片簽入陳奕迅女兒陳康堤（CONSTANCE），作為今年重點新人，今日（6月26日）推出首支單曲 〈doll〉，歌曲由她與知名年輕音樂人Ernest Choi聯手創作，描繪出從有毒、操控性的關係中掙脫的歷程，MV亦已在今晚9點上架。

對於初次MV拍攝，康堤直言當日踏入人生第一個MV拍攝現場，覺得極度緊張但又令她興奮期待，場景佈置讓她驚嘆不已，親身經歷MV拍攝的整個過程，讓她感到眼界大開，康堤分享道：「雖然拍攝節奏好快又有好多鏡頭要拍，但我真係好享受成個過程，仲越拍越精神！同埋感覺到同製作團隊大家越拍越熟，都幫到我能夠好快咁融入到角色。其中要重複拍攝一啲動作幅度比較大嘅長鏡頭，需要高度專注同精力，我覺得好有挑戰性呀！」

MV由康堤的好友、曾為Chanel、Tom Ford、Nike和PlayStation等國際品牌拍攝宣傳短片而聞名的年輕導演MO LYU執導，為康堤的首支MV帶來獨特的視覺美學。這次合作不僅是創意火花的碰撞，更是兩人共同藝術旅程的開始。康堤表示：「好感激可以同咁優秀嘅團隊去製作我嘅第一個MV！佢哋喺成個過程中俾咗好多支持同鼓勵我，如果無佢哋我真係唔知應該點做呢！有咁多好朋友參與呢個MV對我嚟講真係意義重大！」

康堤續說：「其實開頭知道要拍MV時我真係好擔心又好大壓力，到臨拍前幾日我直情感覺到自己越來越焦慮，不停擔心自己可唔可以表現得好、會唔會令大家失望。睇完MV後，我意識到自己都仲有好多進步空間。不過，我都有同自己講呢個只係我嘅第一個MV，相信未來仲會有更多機會俾我去成長和嘗試！」