謝霆鋒尾場唱《壞習慣》掀回憶殺　「如果仲有期我會繼續開」

一連四場的「謝霆鋒進化演唱會」昨晚（4月27日）在啟德主場館落幕，霆鋒在最後一曲《活著VIVA》前感性說道：「好多謝由世界各地來同我完成呢個夢想嘅你哋，其實如果仲有期，我會繼續開嘅！」全場觀眾隨即高呼「encore！再開！再開！」霆鋒鬼馬笑道：「但係冇，哈哈。」。

昨晚古巨基、陳慧嫻、蔡一智、周汶淇、高海寧、曾比特等圈中好友到場支持。日前容祖兒出帖文「投訴」大師兄冇唱《壞習慣》，為答謝歌迷，霆鋒昨晚驚喜加唱經典金曲《壞習慣》，前奏一響即引爆全場大合唱。他笑稱：「話晒我都係Rock友，點知最大聲嘅係呢首！」而歌迷由開騷期待到尾場，想看他過去演唱會經典的動作「掟爛結他」，25年後「進化版」霆鋒選擇以每晚唱到最high時「飛拋Mic Stand」，「進化」後的霆鋒珍惜每支舞台上用的結他，不再為「型」而打爛。經過觀眾握手時「掟護腕」寵粉，讓幸運歌迷搶到以作紀念。

作為首位進駐啟德園的華人歌手，霆鋒被全港及亞洲媒體瘋狂報道，社交平台「謝霆鋒演唱會」關鍵字搜索量飆升，4日演唱會創下超過3.5億閱讀流量，熱議不斷。有傳特首李家超同太太低調進場捧場，由頭睇到落尾。