娛圈單打︱ 咁快嗒糖沉晒船　配對係咪已經完

《女神配對計劃》正在熱播，TVB仲招募踢館男士，即係話節目有排未播完。之但係，剛播出嘅第7集，兩大女神葉蒨文（Sophie）同羅毓儀（Yuki），對兩位追求者表現得情有獨鍾，尤其Yuki，見親男方唔止心心眼，直情沉晒船咁款，難怪觀眾質疑賽果已定，節目已完！

即係咁，Sophie冧爆GM、GM冧爆Sophie，大家早就有目共睹，觀眾亦非常受落。日前又被網民踢爆，二人打風當日拍拖睇戲，睇嚟愛火早就燒到啪啪響。口痕友謂，既然已經揀定咯，仲有冇需要配對落去？對其他參加者都好唔公平啫。

咁Sophie都算深明大義，喺「扯大纜」環節中，眼見被外借嘅富二代Eddie表現落力，於是將鎖匙送咗畀佢，總算唔會偏心晒GM啦。反觀Yuki就離譜啲囉，明明「翻版王浩信」林俊其（Kris）毫無表現，另一參加者T.Max則搏盡老命，後者一樣無法獲得女神青睞，Yuki照樣將鎖匙派畀Kris，連阿Bob都愕晒然。

觀眾睇完呢一幕紛紛鬧爆，對Yuki嘅輿論亦開始反轉，由大讚佢夠True夠Pure，變成鬧佢淨係識得笑，好鬼煩喎。仲話佢對Kris咁早沉船，其他參加者點樣賣力都冇用，仲比乜鬼賽吖。

嗱，閨蜜王菲就大爆Yuki對某位參加者有Feel，講緊嗰個咪就係Kris囉。又唔出奇嘅，少女心事總是詩，眼見Kris高大俊朗，仲講明對自己起痰，梗係躍躍欲試啦。尤其前度其貌不揚，同Kris一拍埋高下立見。正所謂來都來了，食得唔好嘥呀！

東網網站 : https://on.cc/東網Facebook專頁 : https://www.facebook.com/onccnews/