政Whats噏：憶會考成績慘不忍睹　朱江瑋籲考生不要為分數而憂慮

朱江瑋喺舊居執屋期間，無意中摷番廿幾年前首次考會考嘅准考證。

朱江瑋話人生好漫長，有排捱。

雖說求學不是求分數，但學生哥考中學文憑試(DSE)，仍難免感到「一試定生死」嘅壓力。油尖旺前區議員朱江瑋喺社交專頁貼文，指DSE開考首日就係考英文，跟住佢就自爆話昔日第一次考會考，英文唔合格，又以「慘不忍睹」嚟形容數學科以外嘅分數！儘管考試成績不如人意，但日子依然係咁過喎。

朱江瑋話喺舊居執屋期間，無意中摷番廿幾年前，第一次考會考嘅准考證，繼而勾起佢當日應試嘅回憶。佢話考英文雖然唔合格，但後來仍然得到中文大學嘅取錄，仲讀咗個碩士，後來仲做過區議員添！佢話即使到依家英文都唔好，區議員嘅議席又畀政府DQ咗，但依然活得自在。

佢又話同學考DSE成績好，佢當然會恭喜啦；但即使考得唔好，都唔緊要，爬番起身再嚟過囉，反正人生好漫長，有排捱呀！尤其是同學考完第一日英文之後，覺得好唔開心，或者為分數而憂慮嘅話，咁就不妨睇吓佢呢個會考失意嘅過來人，冀可以為考緊DSE嘅同學提供一啲安慰。

新聞