強尼拍靈異劇護身物件傍身　岑樂怡驚有「朋友仔」探班

ViuTV原創劇《弊傢伙！我要去祓魔》由下周一（2月10日）起播出。劇集講述毛無邪（強尼飾）曾是風水玄學界的燦爛新星，通曉各門派的學問，甚至擁有召喚式神和與鬼神溝通的技能。不過因貪念釋放了108隻惡鬼，引發人間浩劫。如今，他靈力盡失，因贖罪而踏上捉鬼之路。毛無邪找到端木零（岑樂怡飾）和路嘉敏（王頌茵飾），開始受理各種軀鬼工作，搜尋那108隻惡鬼。

今次是許博文（強尼）、王頌茵（Kathy仔）和岑樂怡（阿妹）聚首拍劇，Kathy仔坦言由於大家太熟絡，所以笑場較多：「尤其對住阿妹嘅時候，因為佢角色偏向魔tone，但自己就勁hyper，我勁hyper嘅時候阿妹就木無表情，佢又要忍笑喎，所以有陣時佢『焗蟹』，有陣時就我『焗蟹』。」

而擔任多年《總有一瓣喺左近》主持的阿妹，對於今次參演靈異題材電視劇，自言拍攝時有少許害怕，尤其去到一些有歷史價值的地方拍攝時，真的驚有靈界朋友仔來探望大家：「因為我哋做親晚吹，其實已經會有一群嗰啲朋友仔嚟聽嚟睇，更何況我哋係做戲劇喎，件事更好睇，所以講真我有少少驚嘅。」

強尼表示，當屋企人知道自己要拍靈異題材的劇集，都會給他護身物件傍身：「最主要係唔想我帶啲污糟嘢返屋企。」不過頭幾日因為自己很疲倦，加上又弄傷膊頭背脊，所以睡覺時也有疑神疑鬼，聽到聲音之餘亦見到影像，自己很少會有這情況出現。但後來膊頭背脊好得七七八八之後，這情況便沒有再出現。