獨家丨34D何泳芍傳樣衰飛出《學是學非》患暴食症 長睇心理醫生:減完肥又狂食

在剛播畢的TVB劇集《痞子殿下》中飾「哨牙珍」（仇亞珍）的何泳芍（Honey）醜得搶鏡，令觀眾留下深刻印象。年前傳佢因「樣衰」被消失《學是學非》，令曾參加過18年港姐兼晉身最後五強的她受到打擊，更患上暴食症，試過去快餐店，一餐食5個麵包餐，連薯條都清埋，最後食到嘔食到喊。曾身處低谷的她，終於醒覺，明白喺邊度跌低就要喺邊度起返身，目前更加珍惜機會。

採訪：方騫平 攝影：鄧國良

雖然喺《痞子殿下》中只飾演小配角，但何泳芍仍然投入，自得其樂，仲話唔怕被醜化，好想觀眾睇到佢搞笑嘅另一面。她認真說：「由於太過小角色，唔會有人物介紹，我就創作『哨牙珍』一角，設定佢點解要偷呃拐騙嘅背景，反正我都冇包袱咪可以盡做。」擁有34D上圍的Honey直言Enjoy做有演技嘅角色多過做「性感女神」：「我又唔係靚女，好怕喺《3日2夜》中大擺女神甫士。不過，如果角色有得發揮我唔介意全裸演出。」

樣衰事件打擊自信心

當日《學是學非》被飛事件嚴重打擊Honey的自信心，「可能嗰陣時唔知自己做緊乜，好冇Honey嘅感覺，但既然分咗手就唔好問原因。」她又自爆由參選港姐時被封為「性感女神」開始大壓力：「老實講我點會唔知身材受關注呀？加上遇上事業低潮，所以壓力大到有暴食症，減咗肥又狂食過，𠵱家仲會Keep住睇心理醫生。」

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ