葉蒨文隔口罩啜爆曾展望　《女神》CP甜住過聖誕

藝人葉蒨文（Sophie）與曾展望（GM）因無綫戀綜節目《女神配對計劃》配對成功成情侶，原定尋日（24日）甜爆出席聖誕活動，可惜因兩人身體不適，活動需延期舉行。為補償冇得見佢哋嘅粉絲，佢兩個一於拍片放閃。多Pair《女神》情人及參加者尋晚約埋開P，當中Sophie、GM、羅毓儀、林俊其、關嘉敏與黃家俊（Matthew）連監製、導演等齊齊現身，羅毓儀同林俊其以情侶裝示人，連病咗嘅GM、Sophie亦有到場，大家即開Live播晒成個Party畀大家睇。

雖然尋日活動見唔到人，但多得監製送出有色潤唇膏，GM咁啱抽中咗，因為抽中嘅人需要即刻使用並親吻一個人，即刻令最令人期待畫面曝光，GM先塗於口罩外，再同Sophie錫錫，網民隨即瘋狂派心。GM錫完之後，眾人即起哄話睇唔到，二人再錫一次，Sophie仲將頭靠近鏡頭，等大家見到佢口罩上有GM唇印，瘋狂放閃！

眾人各準備價值200禮物，Matthew份禮物狂被嫌棄，因為佢買咗一對裝鹽、胡椒樽仔，由於體積細，開口位置又大，遭大家恥笑「尊嚴」一倒就無，最後由林俊其抽到，林俊其就非常厚道表示好想要；關嘉敏準備湯包及100個一蚊銀仔；Sophie份禮物最多人爭住玩，因為佢買咗4個恐龍頭手套，眾人都拎上手玩幾吓，認真Cute爆。

東網網站 : https://on.cc/東網Facebook專頁 : https://www.facebook.com/onccnews/