超萬能醬料？柚子雞蛋？ 高知縣人氣美食手信 TOP5

自從有直航，多咗好多香港人去四國。除了德島和愛媛，其實高知縣都好吸引：自然風景、建築以至民風都有著大城市沒有的味道，買土坂本龍馬精品外，超豐富的食物亦係必入手信。今次由有著2000款產品的手信店「まるごと高知」為大家推薦五款精選食品!

1） 高知縣日高村產「蕃茄味噌」
蕃茄加味噌，不但沒有違和感，而且更是超萬能調味料。蕃茄採用日高村產的「Sugar Tomato」，甜度遠高「5度」這個蕃茄平均值，達到可以同士多啤梨一拼的「8度」以上。味噌由村內婆婆製作，充滿鄉村味。除了蕃茄和味噌，亦加入了鰹魚和蒜頭，不論伴意粉、加埋蛋黃醬做野菜條醬汁，還是簡單煮蕃茄味噌湯都好好味！

2） 柚子雞蛋
雖然帶番香港就未必得，不過非常推薦試下。嘉賓們表示隔著殼已有淡淡果香，打開蛋殼，倒在白飯，加少少鹽，就能吃到超香柚子味的蛋拌飯，醬油都唔駛加～雞蛋的柚子香來自飼料的馬路村產柚子皮，絕非後天添加，可以安心食用。

3） 土佐鰹魚拌飯魚乾
鰹魚拌飯是高知的傳統料理，是過往漁師以鰹魚的「頭頭尾尾」加上糖、味淋、醬油煮制的簡單東西。時至今日當然唔係食「頭頭尾尾」，而係大大舊的鰹魚比你。試完想買番香港的話可以入手這款魚乾。打開倒落飯到，拌勻就食得。而且一包就2－3人量，懶得煮或者當加餸都ok。

4）土佐之日曜市 啫喱
高知的啫喱之王，早在2013年就在全國菓子博覽會獲獎，年銷達45萬。土佐之日曜市的最大賣點是獨家的「海洋深層水抽出法」，是研究超過20年的技術結晶，透個這技術就能不加熱下，抽取出果肉及果皮的精華，食一個啫喱就好似食咗成個水果咁。口味有橙、柚子、葡萄等，一盒三種口味，抵食又易拎。

5）MIRE餅乾
高知甚至是日本的知名小食，MIRE餅乾誕生於1955年，制作商是「野村煎豆加工店」，冇錯！是一間煎豆加工店所創。當年他們只是和明治製菓買貨加工及銷售，誰知使用炒豆工具處理的餅乾，風味獨特，廣受歡迎，成為了高知縣的代表食物！時至今日 ，他們都只是「加工」，而沒有「生產」餅乾呢～
MIRE餅乾最近更出了雪糕，打開個雪糕就會見到兩塊餅乾，佈裡還混有餅乾碎。吃起來，口感大概和老麥雪糕有點像吧？