【專訪】街頭滑版型男焯嵐與《造星4》個性少女東東談論演藝工作：「花幾多時間同心機落去，就會得到幾多，心態決定境界。」
一個人的好壞從來不能從外表下判斷，滑版情侶焯嵐和東東在隨性叛逆的皮囊之下，言談舉止俏皮逗趣，這對既是 COUPLE 又是 HOMIE 的拍檔一起加入 KB （KELVIN BOY）旗下的模特兒公司 THE BADDIES FACTORY，也貫徹了 KB 貪玩搞怪的「YOLO」思維，一句「唔需要你們好紅、好叻，搵好多錢」成為他們最強後盾，延伸出輕鬆自由的心態，讓他們保存率真性情，勇於闖、敢於試。
工作和滑板有何相似之處？「花幾多時間同心機落去，就會得到幾多，心態決定境界。」兩位愛滑板的年輕人有著愛挑戰的熱血精神，而活耀圈中的 KB 鼓勵了東東踏上更大的舞台 —《全民造星4》。這個平台雖然增加了東東曝光機會，但不擅長唱歌跳舞又低調內斂的個性，讓她難以在競爭激烈的比賽中突出自己，直至團隊的合作機會讓她更投入比賽和表演，愈戰愈勇的表現讓大家有目共睹，「呢半年收穫好多，唔係唱歌跳舞嘅技巧，係我打開左自己好多！係唔同人身上都學到野，明白到好多野唔係你做唔到，只係未做到，好似好勵志，但係真的！」問到焯嵐和東東對未來在演藝路上的目標，他們都表示期待有機會嘗試不同類型的演出，「希望可以係大銀幕見到大家！」。璞玉的可塑性總是珍貴又讓人期待呢。
HELLO 焯嵐東東，再次見面，可否為我們再介紹一次自己？
嵐：Hello 我係焯嵐，大家都叫我阿嵐，今年23歲，係一個Model、板仔。
東：Hello 我係東東，現職美甲師同model，日常喜好係踩板。
上次訪問你們關於滑板的事，今次可以分享一下最初入行模特兒的經過嗎？
嵐：第一次做模特兒嘅時候都係同滑板有關的，因為身邊很多滑板朋友都是從事攝影行業，有一次就係跟我朋友做一個 shooting ，當日我嘅職責只係打下燈幫手做吓雜務，但突然嘅就係當日個Model遲到，隨後朋友同佢嘅同事叫我頂上，個次就係我第一次用Model嘅身份被攝。
東：我記得第一次入行接觸模特兒工作係中學六年級，有一間模特兒公司係Instagram dm我，話想同我見面簽約，我又幾中意比人影嘅感覺，覺得試下無妨（個陣又無諗過會唔會比人呃），試試下就入左行。
那麼又是怎樣加入 KB 旗下的 THE BADDIES FACTORY ？可以回顧當時的情景嗎？
嵐：差不多大概一年前，我女朋友東東跟我說，有娛樂公司想搵佢簽約，當時我哋都係freelance Model，所以我女朋友就大膽問可唔可以一齊上公司傾吓，之後我哋就上咗公司見K B。上咗公司後，KB 同我哋傾咗陣計，佢好清楚同我哋講唔需要要我地好紅好叻搵好多錢，當時嘅我同阿東我都比較空閒，亦都唔知將來會點，好想咩都試吓，所以當日第一次見面就已經簽下合約。
東：有一次 SHOOTING 係幫呀徐個BRAND CHANCE影衫同滑板，kb個傻仔見到就話想簽我，之後仲dm我話上佢公司傾下計，我有睇玩爆你個腎，就知佢份人一定好好玩，所以就同 KB 講我男朋友呀嵐都好好玩架，之後就一齊簽左約！
KB 和你們的關係密切嗎？是師？是友？
嵐： K B同 BADDIES 所有嘅成員其實就好似一家人咁，佢唔止工作上有好多嘅經驗可以教到我哋，喺生活上佢都會成日關心關照我哋。
東：密切呀，亦師亦友，雖然佢年紀大過我地好多，但係完全冇隔幕，因為佢同我地一樣認真時認真，玩時玩，而且真心為我地好，教我地好多野（PS 雖然好多都係無聊低B野），唔係當我地係揾錢工具，係佢呢個傻仔身上學到好多，我地都當佢老竇咁！
入行幾年來，你們最印像深刻的作品是那個？可以為我們介紹一下嗎？
嵐：最深刻嘅作品其實又唔係穿什麼大牌子上身的時候，是一次為 City howwhy magazine 影Cover story ，當時攝影師係topazy leung，主題為大海，拍攝時大概係10至11月左右，天氣比較凍，需要同攝影師下海，一邊游水一邊用菲林相機影。當時用菲林相機影唔能夠立刻知道相片效果如何，所以心情會比較興奮。
東：當然係《造星》MV拍攝，凌晨兩點要返廠化妝 SET 頭，對於住大西北嘅朋友真是好唔友善！加上隻舞對於我嚟講難度MAX，排練同拍攝個過程都好難忘！
近年大家在演出上多了很多新嘗試，你們作為情侶，平常會互相審視對方的演出嗎？曾因為意見不合而發生爭執嗎？
嵐：會啊，我哋通常睇完大家嘅作品之後，都會一齊評論下邊度做得好，邊度做得唔好。我哋經常意見不合而發生爭執㗎，因為大家都係比較有性格嘅人，好多時都有自己嘅一套都會好執着，但就係因為多次嘅爭執大家都有為大家改變到。
東：會互相審視對方嘅演出，例如佢拍 MV 同其他女仔有親密接觸，一開始一定會唔開心發小朋友脾氣而嗌交，大家都要冷靜溝通先會明白大家。
東東在《全民造星IV》30強止步，在節目中最難忘的是那個演出？這半年間收獲最大的是什麼？
東：最難忘係妖女，其中一個原因係因為sica，當時係佢隔離大家都唔知比咩kick到，我都差少少失平衡，當佢仆低左我個腦仲諗緊點算好！點知佢咁叻女救得返！同埋平時大家都着開長褲，第一次露腿又着高踭鞋跳舞，超級大突破。呢半年收穫好多，唔係唱歌跳舞嘅技巧，係我打開左自己好多！係唔同人身上都學到野，明白到好多野唔係你做唔到，只係未做到，好似好勵志，但係真的！
《全民造星IV》這個節目，有沒有改變了你對於「表演」的看法？
東：沒有改變，一直都認為台上一分鐘，台下十年功，背後有好多別人睇唔到嘅野。即使個表演並不完美，亦沒有人有資格睇唔起表演者。
我們今期的主題是 DOUBLE IDENTITY，如果要為自己貼上兩個身份的頭涵，你會希望是什麼？
嵐：模特兒，一個喜歡玩滑板的人。
東：未 land kickflip 的板仔，美甲強迫症師。
滑板和現在的工作之間，有沒有一點相似的地方？
嵐：其實我很多工作和生活都是圍繞着滑板的，有時從事模特兒的工作，客人都會叫我帶着滑板，而我不是模特兒的時候，亦是一個滑板教練。
東：滑板和美甲，或者大部份工作都有少少相似，就係你花幾多時間同心機落去，就會得到幾多，一樣係心態決定境界。
作為一個半公眾人物，總是面對很多標籤和批評，你們以什麼心態應對？
嵐：如果批評得有道理，我會去吸收作出改變，但如果係一啲無理嘅批評，我不會有什麼感覺。
東：以前我會極力回應同反駁，因為我個性好衝動，想為自己平反，而家反而會篩選邊啲批評係為我好，起碼我都學到野。相反一啲無營養的惡意抨擊，會選擇一笑置之，花時間去評頭品足一個人，對人生一點益處也沒有呢！所以我也不會再花時間回應。
人總有多面的性格，你們可以形容對方的兩種矛盾的個性嗎？
嵐：東東係一個好有耐性同埋勤力嘅人，亦都係一個好焦躁同埋容易焦慮嘅人。
東：無耐性，不會陪我行街，但對滑板很有耐性。
焯嵐和東東在未來的演藝路上又有什麼新的期望或目標？
嵐：希望嚟緊大家都可以試多啲唔同嘅嘢，例如電影，戲劇。
東：希望可以係大銀幕見到大家！