宏福苑五級火︱Frankie善舉曝光　贈成箱新衫連冬季物資

大埔宏福苑上月發生奪命五級大火，多位藝人主動協助紓解災情，包括男團ERROR成員193、保錡、男團MIRROR成員Frankie深宵運物資及先後留守支援中心，暖心之舉溫暖大埔居民。原來Frankie唔止當時出力幫忙協助，事後佢持續關注事件，近日更被有受災皮寶寶（Frankie粉絲暱稱）爆料，指Frankie私下DM（私訊）佢，並送上一大箱自家品牌新衫及聖誕樹，即使無家可歸仍感動！

原本居住宏昌閣高層嘅「皮寶寶」發文，憶述火災當日佢雖然因返工避過一劫，但家中兩隻寵物烏龜卻不幸葬身火海，如今更係有家歸不得，為生活、申請資助及過渡性房屋而四處奔波，而佢原本已執拾一堆Frankie個人品牌新衫準備2026年着，結果都化為灰燼：「當日着嘅衫，加物資站拎嘅衫，嗰兩星期就着住一兩套衫周圍頻頻撲撲。」

而當日Frankie親身到宏福苑送物資時，該粉絲群組留言講多謝，之後即收到Frankie主動DM慰問：「你狀態如何呀🥺？」得知粉絲的困境後，Frankie即展現極致溫柔問道：「一切都會好起來嘅😊 天氣都開始凍，夠唔夠冬天衫呀？你話我知咩碼黑定白，我寄啲新貨畀你？」最後該粉絲收到一大箱物資，包括Frankie與其品牌團隊「由頭到腳」全身包辦新衣，決定發文公開Frankie善舉：「真係收咗一整箱衫，由頭到腳全部幫我準備好：上至冷帽、頸巾，下至襪、保溫壺、遮，諗到諗唔到嘅都幫我諗晒仲收到一棵聖誕樹俾我過聖誕🎄 原本仲擔心冬天冇衫著，點知一打開箱就被皮皮同放飛機團隊嘅愛淹沒，收到成堆暖笠笠嘅新衫，多謝你哋細心幫我揀顏色同款式，每件我都好鍾意🥹」

東網網站 : https://on.cc/東網Facebook專頁 : https://www.facebook.com/onccnews/