《新聞女王》CP受歡迎！王敏奕吳業坤獲獎帶挈搵銀

藝人王敏奕與吳業坤分別在無綫頒獎禮中勇奪最佳女配角，以及飛躍進步男藝員獎，今晚（18）兩人現身《新聞女王2》慶功宴。吳業坤早上才跟太太一齊跑畢馬拉松，問到成績如何？他說：「我跑全馬，跑咗5個幾鐘，太太快過我40分鐘，我連佢尾燈都見唔到，我跑完都見唔到佢。（點解你差太太咁多？）我太忙冇法，但好開心可以完成到賽事，夜晚又嚟慶功。」

王敏奕開心可以跟吳業坤一齊獲獎，指觀眾對兩人在《新聞女王》的CP非常受落，網民更形容他們是兩個「菜鳥」獲獎，吳業坤指兩人已算得上是經典CP了，講到兩人亦是「喊包CP」，王敏奕否認：「得獎嗰晚我冇佢喊得咁犀利，我平時喺喊包，但攞獎時我有提醒自己要得體同大方。（吳業坤唔得體？）呢啲係佢風格。」吳業坤直認恨攞獎，故喜極而泣，王敏奕認同獎項能令更多監製留意她，有機會演出更多佳作，問到是否已有機會了？她說：「都有，但仍然係斟酌中，未正式開工。」吳業坤坦言得獎後多了不少工作，又揚言下次開演唱會要邀請王敏奕擔任嘉賓，並大讚對方唱歌好聽，王敏奕大爆對方曾承諾要為他們這對《新聞女王》CP寫歌，但一直未成事，吳業坤解釋因劇中兩人太甜蜜，故很難寫，問到是否會開拍《新聞3》，王敏奕自言不敢問監製，吳業坤稱已問了監製，但對方回覆「未有咁快」。

講到王敏奕多年前的箍牙照近日流出，她表示相信是多年前為電台拍節目的相片，問到會否覺得是黑歷史？她說：「唔係，都要接受，小朋友箍牙好正常，我向來都唔係覺得自己好靚，呢個世界冇醜女人，只有懶女人。」又指箍牙更有學生妹味道，她多年前拍攝電影《囡囡》時，導演都想她加入箍牙造型以更貼合角色。

東網網站 : https://on.cc/東網Facebook專頁 : https://www.facebook.com/onccnews/