朱晨麗因「冇錢」而選美　趙璧渝難忘訓練班畢業捱窮

藝人朱晨麗與趙璧渝早前首次擔任客席講師，到學校與數十位莘莘學子分享演藝生涯，也談及初入行時種種困難及挑戰，面對學生們的積極發問皆盡力解答，與學生打成一片。

二人不單分享了有經理人與沒有經理人的好與壞，更分享入行原因。透過參選港姐入行的朱晨麗，笑言參選是因為「冇錢」：「參選時語言係最大挑戰，當時有勇氣站上台，係因為要『食飯』，知道唔嘗試就一定失敗。當時唔太熟悉娛樂圈，連擺Pose都唔識，但好感恩，過程中有好多本地女仔幫助我，又幫我惡補廣東話，我同佢哋關係都Keep到依家。其實選美時，屋企人話有泳裝環節，佢哋叫過我唔好參加，不過我都努力克服。」身旁趙璧渝即表示很佩服朱晨麗的勇氣：「自己冇選美嘅勇氣，性格承受唔到咁大壓力，但又鍾意演戲，咁啱見到訓練班招生，於是就去試。」

提到初入行所遇的困難，朱晨麗笑言當時自己連鏡頭在哪裏都不知道，更曾因擋住了吳卓羲的鏡頭鬧出笑話，但坦言最大挑戰是面對外界的抨擊及輿論壓力：「當時只識喊，不知喊咗幾耐。」後來她了解到喊都沒用：「要內心變得強壯，調節心態，接受唔到咪唔好睇啲評論。」趙璧渝則直言初入行最大的困難莫過於是經濟問題：「訓練班畢業後人工好少，好難捱，得幾千蚊月薪，所以要搵其他兼職去支持生活。」她亦分享了現時所面對的挑戰：「做藝人要持續畀新鮮感觀眾，屬於大挑戰。同埋依家流行人工智能（AI）短劇，全部演員都係AI，真係好擔心取代真人演出。或者到時唔需要真人演戲，已經可以出一套劇。」入行至今13年的她，揚言仍想在演藝路上馳騁。至於朱晨麗就指作為藝人，最大恐懼是沒有工作，曝光率不足，擔心逐漸被觀眾遺忘，她更表示會順應趨勢，經營社交媒體，但仍會堅持演員身份。」

東網網站 : https://on.cc/東網Facebook專頁 : https://www.facebook.com/onccnews/