娛圈單打︱女神自認戀愛腦　被爆失身點算好

《女神配對計劃》出街後激起回響，除咗葉蒨文同曾展望CP感十足，另一風頭躉肯定係樣子甜美、身材勁爆嘅李芷晴！人紅是非多，Stephanie哭拒奀星周嘉全後，又遭網民爆料，話佢係個「容易失身的女人」！What？唔係啩！

Stephanie自爆拍過6次拖，形容自己「戀愛腦」！本來呢，女孩子鍾意被愛冇乜唔妥，何況女神呢期備受力捧，搵番個門當戶對嘅男友十分正常。不料因此招來別人眼紅，傳出是非，都可謂始料不及。

話說有網民言之鑿鑿爆料，指Stephanie曾向身邊好姊妹透露，拍攝《愛．回家》期間被「送水輝」力追，女神隨即沉船，可惜所愛非人，失戀之餘仲多次失身！吓，唔係咁爆啩？就憑「送水輝」？嗱，二人的確有一排傳過緋聞，話「送水輝」許家傑撇甩「大小姐」林淑敏，狂冧「Elaine」李芷晴，之但係有指Stephanie嫌雙方年齡差距大，只係以「前輩」形容對方，緋聞不了了之。

家陣忽然被爆失戀兼失身，好事之徒都大感意外，但更多網民認為只係吹水，畢竟網上爆料噏乜都得，女神無辜被屈，認真慘情。咁又係呀，Stephanie後生又靚女，連姜大衞兒子姜卓文都事先張揚，直認參加節目就係為咗追求伊人，可見魅力沒法擋。再講吖，男未婚女未嫁，點玩點食都係人家自由，若然唔夠紅，鬼有人得閒唱衰咩，所以啫，不招人妒是庸材呀！

點都好，呢次無啦啦招惹是非，正好提醒Stephanie更加謹言慎行。藝人形象好重要，家陣正值上升期，千祈唔好行差踏錯！

東網網站 : https://on.cc/東網Facebook專頁 : https://www.facebook.com/onccnews/