羅力威神隱5年　開腔剖白暫別樂壇原因

今年39歲的羅力威消失於樂壇5年後，轉做獨立歌手後自資推出的新歌《悠揚一曲》，日前接受電台專訪，問他新歌是否跟至親有關，他首度披露5年來家庭經歷多重巨變，至今才有空重投音樂創作：「一直無講明，無乜人知阿僑（太太雨僑）媽咪係教師，兩年前阿僑媽咪過身，對我哋影響好大，因為我哋無經歷過親人離世。」

原來，羅力威及雨僑誕下大女Harper的初期，外母同時發現患癌，再加上囡囡患有「高敏症」，令一對新手父母由喜變悲、措手不及，他說：「BB女出世本來好開心，阿僑媽咪點發現有病？就係幫手湊外孫嘅時候突然好辛苦，再去做身體檢查發現有病。所以嗰個階段，原本諗住三代同堂好開心，但突然成件事反轉晒。因為我要做好照顧者兼安慰者，睇見太太係好心痛。」及至大女三歲高敏症改善及開始入學，他坦言多了空間創作新歌，亦披露太太首聽時感動痛哭：「當時只係得電子琴，我叫佢過嚟坐響我側邊，由頭到尾唱畀佢聽啱啱填好嘅詞，佢都好感動都有喊。」

神隱5年，更於3年前約滿簽了10年約的英皇唱片，羅力威指夫妻收入主要來自雨僑的網店，他說：「我幫咗手已經成7、8年，好感恩，生意係OK。」坦承當年簽英皇10年，合作並非暢順：「10年都係一個試用期，坦白講一定係唔夾。但好老實，我同好多人都唔會夾。唔單止係對一間公司，真係好難要求對方諗法同我一樣。」至於選擇自資出歌不再簽公司，他亦說：「好老實，我唔抗拒。但係比較難傾得成，因為我係羅力威，我會假設同我相處嘅人都係羅力威，唔想有溝通上唔順暢。」自資出歌因為要計錢，他坦言未知下一首計劃：「希望有唔同渠道嘅支持，support到我下一首。因為我從來都唔想將創意同金錢掛鈎，我唔想金錢影響我創意發揮。」

羅力威重投樂壇，他指不擔心樂迷善忘，至於5年來見證同屆戰友古淖文先後冒起，他由衷地說：「首先我戥佢哋開心，我知道佢哋堅持追求呢件事好耐！古淖文係天生屬於舞台，每一個識佢嘅朋友都知。就算去茶餐廳，都登台咁嘅款，哈！會好王者姿態咁叫餐蛋治。而我，我好清楚自己要啲乜嘢、鍾意啲乜嘢。譬如如果有人叫我參加《中年好聲音》，我唔會答佢我去定唔去，我只可以回應，呢個人並唔了解我。」

東網網站 : https://on.cc/東網Facebook專頁 : https://www.facebook.com/onccnews/