陳嘉慧首拍迷姦戲做足功課 12歲赴日生活操流利日文

TVB劇集《法言人》踏入結局篇，劇情講到TK（陳少邦飾）為了討好Martin（唐嘉麟飾），將魔爪伸延至「律政小花」Grace（陳嘉慧Erica飾），二人與Adam（張達倫飾）等人傾公事期間，TK眼見Martin垂涎Grace美色，竟落藥令Grace險被迷姦，幸好在Grace寬衣解帶之際，Adam趕至將其救走。

26歲陳嘉慧（Erica）坦言拍攝前心情緊張，而且做足功課：「因為我未拍過呢類型戲，所以喺拍之前我有上網睇吓啲前輩點做。其實去到現場，我覺得張達倫比我壓力更大，因為佢知我第一次拍呢類型戲，所以好Take Care我感受。」Erica笑言最難忘是被張達倫公主抱一幕：「因為嗰Take來來回回Take咗幾次，我都好擔心佢仲抱唔抱得郁我，因為我體重都比較重。」

以甜美笑容見稱的Erica，今次演繹的角色不但帶點機心，更因懷有不可告人秘密顯得心事重重，與以往角色差別頗大，Erica亦直指今次角色確實會有令觀眾意想不到的發展。

陳嘉慧於小學畢業後隨母親到日本生活，於當地完成中學和修讀櫻美林大學學士課程。2016年暑假，她跟朋友返港參與TVB臨時演員招募，客串演出《溏心風暴3》而對演戲產生興趣。

Erica於2017年暑假回港期間，成功獲取錄加入TVB藝員訓練班，翌年畢業後加入TVB。曾演出《解決師》、《迷網》，於《愛上我的衰神》首度擔任女主角並入圍《萬千星輝頒獎典禮2022》「最佳女主角」及「最受歡迎電視女角色」最後五強，另外亦入圍「飛躍進步女藝員」最後十強。