娛圈單打︱忽然脹爆變肥婆　女人心機難提防

馮盈盈的網上相明艷照人，現真身卻失色不少。

幻覺嚟嘅啫，嚇我唔倒嘅！出名美麗動人嘅前港姐冠軍馮盈盈，日前出席TVB高層樂小姐嘅生日宴，事後樂小姐喺社交網分享靚相，當中有同盈盈、三哥嘅合照。之但係，橫睇掂睇，左睇右睇，都硬係有啲唔妥，FYY脹咗唔止一個碼，腰粗有胃腩，塊面闊晒，波都揼埋，連額頭都反光，搞到好似頭髮稀疏咁款！

係咪得罪咗人呀？網民對此難以置信，紛紛大喊認唔出！反而企正中間、66歲嘅樂小姐瓜子口面、身形纖瘦，獲讚靚過港姐！

即係咁，早前電視台先至播出，FYY拍住家英哥做嘅綜藝節目《飲茶》，不論係節目入面，定係出席宣傳活動，FYY都係皮光肉滑、纖腰細腿、靚到沊一聲，加上營養學兼食品工業管理碩士學歷，近期更有節目出街教人「食好D」保持健康，點可能士別三日、脹爆現身？係咪搞錯咗啲乜？

粉絲就覺得大整蠱，懷疑樂小姐P圖只P自己，映照到FYY零舍大份！哈，女人之間嘅小機心真係講唔埋，無論幾多歲都好，最緊要靚！之但係樂小姐貴為電視台高層，個個藝人都係「囝囝女女」，照計冇可能特登整醜個女啫！再睇吓同場其他出席者，合照全部十分正常，睇嚟粉絲太過陰謀論，唯一原因都係FYY肥咗！

話時話，就嚟又選新一屆港姐，FYY入行就快10年，事業發展始終平平，反而是非層出不窮；與此同時，學海無涯，不斷進修，佢嘅學歷比起演藝生涯更加精彩。再睇吓早佢一年當選港姐冠軍嘅麥明詩，早已嫁人生仔，成為人生勝利組，唔知幾時先至輪到FYY上岸呢？

娛樂