江嘉敏積極瘦身晒長腿　慫恿林穎彤着泳衣拍節目

由藝人江嘉敏和林穎彤（Bella）主持的HOY TV新節目《好好生活》，今日在荃灣廠內舉行開厰拜神儀式，節目裏面她們負責坐廠，由其他「採購員」四出在香港、內地和台灣搜羅超荀生活資訊，嘉敏表示節目已開始拍攝，「喺廣州搵到1蚊一件衫、5毫子隻戒指和零蚊一隻杯，我摸過件衫質料係ok，絕對冇騙案，（你都買好多？）賺埋要倒貼添！我多口話有折就買，點知真係有折。」Bella爆監製有諗過做帶貨，希望到時再找她們合作，Bella之前透露讀營養學為轉營，考慮遲些可能將自己的產品帶上節目。嘉敏指除了介紹生活用品，還有養生資訊如採耳，講笑很適合她的年紀。

兩人在前公司TVB時從未合作過，Bella表示曾於網劇跟嘉敏碰頭，揚言要同嘉敏盡快Friend，因為今日收到消息，原本30集節目將會加集，希望爭取出外景。「喺呢度都好習慣，之前拍過劇，熟習咗呢度模式，同嘉敏一齊又開心，佢係開心果。」

江嘉敏近來積極瘦身，今日露出長腿，透露已成功減了2KG，靠平日自己下廚煮嘢食和做運動減磅，直言仍未達心目中的磅數。Bella建議可嘗試食素，亦指嘉敏愈拍愈瘦。問加集數會否有水着放題福利？嘉敏笑謂：「睇吓加幾多集、加幾多人工啦！再傾啦！覺得健康美會接受，電視尺度都有底線，如果喺適合場合係可以，好似游泳套餐可以諗諗。」嘉敏隨即問Bella：「你係咪着先？你着我着啦！」Bella笑言：「我要減減，努力塑造吓身形，不能太扁平。」

東網網站 : https://on.cc/東網Facebook專頁 : https://www.facebook.com/onccnews/