政Whats噏：前支聯會常委梁錦威今出冊　自爆獄中確診新冠

前支聯會常委、葵青區議會前主席梁錦威今日刑滿出獄，佢喺社交平台報平安之外，仲自爆坐監期間確診新冠肺炎，但就冇重症，雖然瘦咗，但佢強調唔關「中招」事喎。

梁錦威嘅貼文中話「我今日出冊，原地復活」，同時多謝呢段時間關心過佢嘅朋友。講咗自己「中招」冇大礙後，仲話「總之我現在一切都安好」，至於之後嘅事就「再講啦」！

話說去年解散嘅支聯會，包括梁錦威在內嘅5名前成員，被指拒絕向警方國安處提供組織活動嘅相關資料，被控一項沒有遵從通知規定提供資料罪，佢哋否認控罪，雖則梁喺1月底認罪，被判監3個月。

梁亦因前年不理警方反對出席六四集會，被控煽惑及參與未經批准集結，去年被判囚9個月，其中一個月與早前六四集結案同期執行，即加監兩個月，總刑期11個月。

另外，梁亦因被判囚超過3個月，失去葵青區議員資格，而該區議會主席亦已改選，由盧婉婷接任。

東網網站 : https://on.cc/東網Facebook專頁 : https://www.facebook.com/onccnews/