BIG FOUR演唱會海報曝光　林海峰大爆秘聞

「BIG FOUR」張衞健（Dicky）、許志安、蘇永康和梁漢文（Edmond）將於8月在紅館舉行演唱會。相隔12年BIG FOUR合體再踏紅館，演唱會海報更重金禮聘林海峰（Jan）擔任創意大腦，星級攝影師夏永康親自操刀。Dicky爆料「BIG FOUR」由Jan命名，他續說：「我哋第1張演唱會海報，4個人咬住1支玫瑰花嗰張，就係由Jan幫我哋做。好開心今次我哋三顧草廬，邀請到佢出山。」Jan幽默回應：「嗰次演唱會喺2010年，即係隔咗15年先至有第二個job，都算係咁，我都終於發市！」

今次演唱會「HAPPY TO SEE YOU ALL 」再由Jan命名，他笑言原本名字另有構思：「原本諗住佢哋咁耐無見大家，想用『BIG FOUR無穿無爛演唱會』，但中文名呢個唔係幾好，不如諗個英文名，就叫『BIG FOUR BODY CHECK演唱會』，每次上台都係你哋同觀眾嘅1次體檢。」Dicky補充：「唔（做）騷唔知身體好！」

拍攝海報時現場播放有關友情的歌曲，Jan笑說：「最初揀咗《監獄風雲》首歌《友誼之光》，諗住播呢啲歌幫佢哋帶入情緒，後嚟發覺都唔需要，佢哋四個好快就好自然咁入咗嗰個氛圍。尤其是Dicky，佢好清楚我想大家表達乜嘢，1直帶住大家，始終都係最大（年紀）。」Dicky 1臉認真扮作有感而發說：「長輩嘛，『牽牛上樹』係有啲難度，仲要係3隻牛，但係佢哋都算乖、聽話！」

東網網站 : https://on.cc/東網Facebook專頁 : https://www.facebook.com/onccnews/