娛圈單打︱真性情再加分　這女神堅係得

繼續係《女神配對計劃》！自從呢個戀綜出街後，話題熱度真係冇得輸！就算係言必稱杯葛老人台嘅網民，一樣又要睇又要鬧，連Haters都吸納埋，就知呢個節目大成功！剛播完嘅一集，唔少觀眾被「黑馬」關嘉敏嘅真性情吸引喎！

之前Carman為Babyface被淘汰而灑下同情淚，直認Babyface有誠意又不斷提升自己，因而深受感動，獲網民大讚夠晒真性情。最新一集，佢同三位追求者一齊食「三角枱」大餐，外界原以為姜大衛個寶貝仔細John實食冇黐牙，殊不知最後殺出程咬金，輸咗畀iBanker Matthew，關鍵係Carman愛犬Two Two竟然不怕生埗黐實男方，終於贏得女神青睞。

網民焦點除咗睇Carman點樣抉擇，最得人心其實係佢嘅率直不做作個性。Carman全程有碗話碗、有碟話碟，唔扮嘢做自己，其後仲坦白透露過去一段不愉快戀情，顯得坦蕩蕩。何況佢仲係愛狗之人，兼且同媽媽關係密切，誠如佢自己話齋，鍾意小動物兼孝順嘅人，衰極有限！

講真，開播前大家都覺得Carman唔夠起眼，相比葉蒨文、李芷晴嘅波霸級身材，Carman相形失色，加上佢不顧形象女扮男裝嘅「痰輝智」，實在過於維肖維妙，以致開播初期，網民都話太有痰輝智既視感，大叫頂唔順。邊個諗到，Carman最大賣點並非個殼，而係佢嘅真性情。佢仲會講笑話氹男友，咁貼心嘅女友邊度搵吖。

今年初Carman獲提名「飛躍進步女藝員」，雖然飲恨，但金子始終會發光，係咪咁講先？

東網網站 : https://on.cc/東網Facebook專頁 : https://www.facebook.com/onccnews/