Nowhere Boys概念店Mini Live 邀Winka任嘉賓 兌現2年前承諾

寰亞樂隊Nowhere Boys（NWB）今年成軍10周年，於尖沙咀開設的NWB POST OFFICE「給十周年的概念店」，上星期六舉行首場「Nowhere Boys mini live gig」，邀請陳泳伽（Winka）@COLLAR擔任嘉賓，他們首度現場合唱《異人之野望》，NWB將Winka的失戀歌《今期不流行》，改編成喜慶版本，現場逾百歌迷圍觀。

當日NWB一口唱出四首作品，Van獻唱《放飛之旅》時，突然「發台瘟」忘詞，雖然他一度背向觀眾，用眼神向隊友求助，但他的一班好兄弟卻「見死不救」，刻意避開Van的求助目光，令場面變得尷尬又搞笑。

NWB完成演出，輪到Winka出場，獻唱他們合唱的作品《異人之野望》，NWB主音Van更道出2年前對Winka的承諾：「好多謝Winka兩年前肯同我哋合作《異人之野望》，首歌又快、又急、仲好另類，當時我哋NWB應承過Winka，呢首歌第一次嘅Live，一定要齊人先會唱，估唔到一等就等咗2年，但呢個承諾我哋一直緊守住。」

NWB五子講得出、做得到，Winka對於這次遲來的Live，感動之餘，還帶點自責，原來與她去年10月，未能現身NWB在西九自由空間舉行《US》演唱會有關：「我好愧疚，因為舊年你哋舉行演唱會，我咁啱喺同一日開show，唔可以同你哋合唱，我有問過我經理人，可唔可以放我過嚟玩呢首歌，佢叫我唔使諗，因為日子撞到正。」

Van安慰說：「將呢個合作機會放咗喺NWB嘅POST OFFICE，一個對我哋更有義意嘅地方，係仲好，多謝你成為我哋第一個嘉賓。」唱完《異人之野望》，他們再合唱Winka的新歌《今期不流行》，還唱了兩個截然不同的版本，分別是原裝的「失戀feel」，還有NWB重新編曲的「喜慶版」。

喜歡玩Live的Winka說：「我哋係今日嚟到現場先夾歌，我就係鍾意呢種improvised（即興）。」

除了音樂上交流，Winka希望日後有更多機會，同NWB有美食交流，她說：「音樂以外，我同Nate（NWB鼓手）比較多互動，佢有教我打拳，但我都好鍾意種植、仲有食嘢，我見到Van煮嘢食咁叻，好想下次佢哋有聚會可以叫埋我一齊食好嘢。」

最後NWB唱出最新派台作品《給受困者的一封信》，為首場「Nowhere Boys mini live gig」，寫上完美句號。

（即時娛樂）