【余建在言】TVB自揭底牌匪夷所思 《季前賽》收視耐人尋味？
今個星期，TVB在職場常用平台Linkedin帳戶，出了一篇近乎跟客戶講「你係咪傻咗？」的帖文，先在業界惹起熱烈討論，繼而被媒體報道後成為熱話。雖然未知此文出街後，有否鬧醒幾多位沉睡中的Marketer，學精了急急轉投TVB懷抱，但可以肯定，該文最大貢獻是短短數天內，將幾個業內專用詞發揚光大，令廣大市民都學懂了，長知識了。
該帖文以《老夫子》四格漫畫起題方式，用「匪夷所思」為題，向客戶發問幾條問題，當中包括︰點解𝗖𝗣𝗥𝗣貴到咁都仲要買？點解咁高都睇唔到？點解Marketers唔要高𝗥𝗢𝗜？唔通你真係唔使同老闆交代？
文章本身供業界看，對升斗市民而言，連環爆發數個專業用語，無疑會生畏，道理仲好似硬淨一點，但只要你肯Google一下，那兩個英文縮寫不難理解。𝗖𝗣𝗥𝗣（CPRP-Cost Per Rating Point）收視點成本；𝗥𝗢𝗜（Return On Investment）投資回報率，兩句講晒︰「我收視咁高你都唔喺我度落廣告，你唔使同老細交代啲亂Fing去邊呀？」
對於一眾Marketer點解咁唔生性，亂使廣告費，坊間有不少業界人士都有出文解答，在這不覆述，反而想講，從這篇帖文看到TVB的處事方式並沒有與時並進，態度一成不變。早在2021年頭電視大戰開始，時任總經理曾志偉已經在笑ViuTV得幾點收視，只配跟J2拼，當日已有不少人講，時下電視台不再單單以收視分高低，能在坊間掀起討論度及影響力更為重要，而且TVB都穩佔家庭客，ViuTV進佔年輕人市場，正所謂各有各做。
事隔年半，TVB換上兩個字眼向大家提出質問，說到底又是收視，可見TVB內部未有認真、虛心重新了解市場運作，還用上不同運算、方程式繼續表揚收視的重要性。再者，從幾條問題中，更無意間「劇透」了自己收視再好，收費就是不夠對家高；現在不夠廣告，乾著急得要發窮惡。
不過更吊詭是帖文所講《下流上車族》高收視23.2點，另一個台同一時段只得3點收視，以極大差距去強調𝗖𝗣𝗥𝗣超值。假設這說法是針對ViuTV，人家同時段是播放韓劇《衣袖紅鑲邊》，韓劇在ViuTV運作上向來是攝檔期，冇收視壓力，畀你贏又有咩意思？
既然要鬧醒大家，點解唔等多一個星期，用自己台慶劇《美麗戰場》結局篇的收視，跟人家同樣是重頭劇《季前賽》首周收視做比拼呢？據報《美麗戰場》結局篇跨平台收視是22.8點，結局對首播，你已有優勢在，況且如果你可以憑陳瀅大勝姜濤，豈不更值得拿來大造文章？現在避重就輕選擇性報數，足見當中有數據「唔夠好睇」，可能是對方數字比預期高，又或是差距太窄，贏得不夠亮麗。當中真相到底如何？用回《老夫子》方式回應，真係「耐人尋味」。
撰文︰余建
Facebook專頁︰https://www.facebook.com/Stupid.View
留言 38