草蜢宣布4月紅館開騷　為GenZ特設專屬歌單

出道逾40年的草蜢將於今年4月在紅館舉行一連6場演唱會，演唱會海報今日率先曝光，草蜢預告有驚喜，除了追隨逾40年的「元老粉」盡享回憶殺，更為GenZ「嫩粉」特設專屬歌單。日前才剛完成上一個巡唱的草蜢立即展開成軍40周年全新企劃，並以今年4月紅館演唱會揭開序幕，他們早前以一身華麗造型拍攝演唱會海報，蔡一智說：「記得上次影演唱會海報係2022年，眨吓眼上一個演唱會做咗幾年，今日我哋又再靚靚仔仔影全新演唱會海報，時間真係過得好快。」蘇志威說：「今日見我哋着到咁閃咁靚，就知道我哋嚟緊4月演唱會有幾咁靚。」

阿智則揚言影海報只是「頭盤」，正式開騷的服飾和舞台布置將靚多十倍，蔡一傑說：「我哋由早上開始，拍咗接近七個小時，我尋晚敷咗幾個Mask先至瞓，確保今日好Fresh。」阿智又透露今次拍攝海報最困難的是他們三人分開拍攝，大家不知道對方的甫士，打頭陣的傑仔說：「我要考慮埋佢兩個會點做，手勢動作幅度唔可以遮到佢哋，要靠想像力。」

講到演唱會歌單，傑仔說：「我哋做咗40幾年，好多心機血汗，歷年來做過嘅唱片入面，就算精選都好多，真係唔知唱邊啲歌好。」阿智則預告將為GenZ炮製專屬歌單，傑仔說：「依家大熱Cantopop，我哋嘅歌完全中晒所有朋友嘅心，可以一齊玩，一定非常開心。」阿智笑說：「想體驗『沉浸式港的士高』嘅朋友，今年四月，你發達啦，有草蜢陪你！」蘇志威表示：「呢個世界太無常，唔知幾時再有下一次，所以要珍惜今次！」阿智認同：「上次開紅館仲係疫情，觀眾都戴口罩，今年大家可以盡情尖叫，我哋亦可以見到觀眾嘅笑臉，可以一齊大合唱！」傑仔揚言稍後公布Dress Code，希望觀眾一齊打扮得靚靚，盡情投入草蜢演唱會世界。

東網網站 : https://on.cc/東網Facebook專頁 : https://www.facebook.com/onccnews/