市道差傾開劇 商天娥自爆要求加人工不果

商天娥（娥姐）為代言10多年的家品品牌現身工展會，談到明日冬至，娥姐表示因為人數太多，今年不會下廚，但聖誕節已約好一眾好友食大餐。她說：「會煮8個菜，仲會煲湯。依家食得少好多，日頭食豐富啲，夜晚都係飲湯多，個胃都細咗。（有份煮冇份食？）係啊！鍾意煮多過鍾意食。」問到老公豈不好幸福？她直言：「係㗎！所以佢咪食到佢大肚腩，又肥咗10磅。」
娥姐近年甚少拍劇，隨之而來是學習養生之道，但她說：「農曆年後要開劇，所以我都擔心會瞌眼瞓，到時要拍通宵、仲開早就唔知點算。」她透露娘家邀請她來年1月拍新劇，但訂好跟老公去旅行因此而推掉。談到無綫裁員，她說：「朋友暫時冇影響，佢哋都話抱平常心。」並指現在市道差，所以之前傾開劇要求加人工，公司都話現今環境比較難。