周潤發Tyson Yoshi獲點名　網友分享與「禮貌藝人」親身經歷

娛樂圈藝人私生活一面，近日成為網民熱討話題。有網民開POST力數圈中有禮貌藝人，更分享他們的個人親身經歷。

周潤發

周潤發生活貼地，不時被網民野生捕獲都禮貌合照。有網友指自己細個做茄喱啡的時候，周潤發吩咐他的司機送自己返屋企，亦曾在街上偶遇劉青雲和陳豪，兩人都很nice和他合照，令他印象難忘。

Tyson Yoshi

Tyson Yoshi友善親民眾所周知，有網友指在平安夜於灣仔見到TysonYoshi，表示「佢泊車有啲困難，幫手睇咗睇位，好小事但佢係咁講唔該，勁正，仲肯同我影張相。本身其實唔係你fans，不過之後我有係咁聽你啲歌，好好聽，下次會去睇演唱會。」

陳栢宇

有網民指曾在emax撞到陳柏宇帶大女去睇Disney歌劇，表示「問佢可否影相佢話冇問題，仲同埋女女一齊影，今年喺佢屋企樓下附近撞到佢帶細女去食早餐，同佢同埋佢細女講早晨say hi都係好nice。貼地歌手爸爸」

吳彥祖

吳彥祖除了是型男擔當，更是貌大使，有網友指曾貪玩做老臨，有次拍廣告主角是吳彥祖，憶述：「佢一入場都冇睬人專心拍攝，完成晒之後臨走前同大家講：『辛苦晒咁多位，88』好斯文好有禮貌好好笑容，自此對佢好加分。」

關詠荷

有網友憶述關詠荷的好人好事，指以前每到新年關詠荷都會到他媽咪的平民舖頭幫襯買東西，即使貨品好重她都會自己拎，不會假手於工人姐姐或司機。其中有一年她更帶同女兒去拎嘢，更着女兒要與他母親打招呼和講唔該，甚有家教，好乖。

馮允謙

有網友發憶述事件經過，表示：「之前返event要跟JayFung拍段片，自己因為太緊張要再影多次亦沒有遭對方嫌棄：「佢完全唔嫌麻煩，仲笑住同我講Sorry要辛苦我拍多次，都唔係你錯講咩sorry喎，係都係我講」。之後網民想與Jay Fung合照，他超禮貌話唔好意思，轉頭忙完再影，之後Jay Fung竟然真的再來找她合照：「hi，你點呀～辛苦嘛」、「我冇唔記得你㗎，我哋影相啦！』黐線佢真係超級好😭😭事隔兩年我都仲係覺得好難以置信。」

林子善

不過，近日有網友發文數無禮貌藝人，當中林子善卻榜上有名，該網民說：「林子善，之前去佢間龍鳳冰室食常餐，米粉個湯好似清水健咁清，咁岩林生係到，同佢打個招呼，順手講聲個湯真係無味，點知佢一句，『係咁架啦，唔岩食下次咪唔好X黎囉』。」不過，亦有網民大撐林子善人品好，指他：「林子善勁nice喎。之前喺將軍澳壽司郎見到佢哋一家我跌咗嘢佢仲幫手」、「冇證據，你話隻老鼠識講嘢都得㗎啦，我喺大坑咁多年，見到子善都好Nice同我打招呼喎」。對於無根據的指控，林子善親身留言還擊，更指得啖笑：「真心對我一啲傷害都冇。」

林子善對於指控，他還擊傳聞表示：「喺度睇咗咁多留言！關於我嘅真係得啖笑，唔係想得失大家，而係有網民想畀我知道有人講緊我add咗我入嚟，對我一啲指控真心，我一向做人都係禮貌待人行先，睇過啲事根本都冇發生過，吹得就吹，有陣時做人唔好咁啦，真心對我一啲傷害都冇，但如果做呢啲事令到你可以紓緩吓嘅絕對冇問題，作為一個公眾人物都係娛樂下大家，但可以睇到呢啲人絕對冇接觸過我，認識我嘅人，知道我對人一向都有禮貌有家教，新聞嘅嘢有陣時我哋自己都費事越描越黑，所以不作解釋，好多都係標題黨，祝大家生活愉快，其他嘅嘢唔再一一回復了。」其後，他再次留言指：「其實都好兩面睇！好簡單我成日都講一個道理，正常人會睇到扶阿婆過馬路，鍾意你嘅人，仲會讚你好好又敬老又有愛心，但唔鍾意你嘅人，佢嘅眼裏便只會睇到，你扮嘢扮有愛心，再差啲嘅係呢條友係咪準備推阿婆出馬路，所以呢個世界真係好難解釋咁多，做返自己問心無愧，我嘅生活唔係為別人而生存，亦都唔係需要任何人讚頌，唔好傷害別人令人唔開心，自己同家人健康快樂已經足夠！其他嘅事鍾意點諗就點諗，正能量去面對。」

林子善再發文否認自己沒有禮貌，他表示：「我從來唔會對客人咁冇禮貌！過到呢啲情況我通常，會同客人講聲唔好意思，我幫你cut咗佢，需唔需要換過第二啲食物，從來我唔會解釋咁多，用禮貌嘅。態度，聆聽客人嘅需要，用最快嘅速度安排返，因為我淨係知道一樣嘢，顧客食得開心佢會返嚟，食得唔開心，你唔收佢錢佢都唔會再返，所以我一向對客人，應對禮貌安排細心效率快，所以我一睇必定唔係我虚事嘅方式，以前有啲客話我杯奶茶唔夠熱，我都唔解釋咁多，直接車走，換過杯新嘅俾佢！但佢冇自己諗過自己坐咗成10幾分鐘喺度玩電話，但我哋都唔會得失客人，一杯奶茶幾多錢？但一個客人係好寶貴，每一個客人係自己用心去儲返嚟，從小到大我都明白呢個道理！我唔係話要解釋啲乜嘢而係，有錯我一定會認，但呢啲無理指控我真係接受唔到，因為我從來唔係啲咁嘅人。」

東網網站 : https://on.cc/東網Facebook專頁 : https://www.facebook.com/onccnews/