姜皓文獲檳城邀請過年亮燈　隔空同古天樂拜年

藝人姜皓文蛇年年底經常於內地及香港來來回回工作，而太太則折返馬來西亞檳城處理家事，夫婦倆唱「分飛燕」唱足起碼3個月，而趁馬年到來，姜皓文終於放假會嬌妻。目前正身在檳城的他，獲當地政府邀請參加寺廟的亮燈儀式，早前又相約同樣身處馬來西亞的陳山聰跑步健身，預算下月初才返港。當問到有否向經理人公司老闆古天樂拜年時，他表示﹕「透過電話拜咗，返香港後睇吓時間夾唔夾到見面啦。」

談到檳城過年，姜皓文坦言﹕「好熱鬧，事關呢度福建人比較多，佢哋會封街爆爆竹同舞獅，加上大年初九拜天公後，居民先覺得真真正正過年嘞，所以農曆年氣氛持續好耐。」而日前他更與親友於家中舉行「撈起」儀式，食材規模等同一張飯桌，令人咋舌。至於馬年工作，姜皓文透露﹕「喺檳城同電影人搞緊個劇本，預算年中開鏡，同埋下個月我主演嘅懸疑片《蛊降》會喺馬來西亞及新加坡上映，要做宣傳。而大約4月份我喺香港都要開工嘞，遲啲再同大家透露詳情啦。」

東網網站 : https://on.cc/東網Facebook專頁 : https://www.facebook.com/onccnews/