余香凝遺傳媽咪愛唱歌基因　最快年底有新作面世

影后余香凝（Jennifer）自從當上媽媽後，更了解及明白自己母親的辛苦，而近日余媽媽迎來生日，Jennifer即與胞妹齊齊送驚喜，安排飯局與媽媽切蛋榚慶生。余媽媽有兩位愛女，以及兩名乖孫陪伴，笑到見牙唔見眼，Jennifer更大爆媽媽的秘密：「佢好鍾意唱歌㗎，好彩嗰晚食飯場地有卡拉OK提供，畀佢一展歌喉，大家都玩得好開心。我依家諗起，我、妹妹同我個女都咁鍾意唱歌，應該係媽媽嘅遺傳，哈哈！」

談到母親，Jennifer感性表示：「我有時要做嘢，或者想同老公出去拍吓拖，我媽咪都會二話不說過嚟幫手，近期睇咗編文章講女兒嘅自由係媽媽畀嘅，我真係十分認同，母愛好偉大。（送咗啲乜做生日禮物？）冇特別安排，不過我成日鼓勵佢同啲朋友去旅行，等佢行吓、休息吓，每次我同妹妹都會請佢去，覺得佢都應該有自己的生活。」

談到近期工作，Jennifer不諱言稍後將陸續有新作面世：「之前喺台灣拍咗套戲，同埋我同廖子妤喺澳門拍嘅《女孩不平凡》都安排緊上映，最快可能下半年或明年年初推出，依家都趕緊後期。雖然工係開少咗，但我身邊同業都好積極，大家會搵啲嘢嚟學，好好裝備自己，等有需要時可以用番出嚟。」據悉《女》片內Jennifer與廖子妤將扮演一對同性伴侶，迎來了一次演技挑戰，相關劇照亦開始流出。

東網網站 : https://on.cc/東網Facebook專頁 : https://www.facebook.com/onccnews/