【頭條戲場】《小婦人》活化名著貼堂之作

經典世界名著《小婦人》暢銷全球，多年來被翻譯成55種語言版本，更曾被改編成舞台劇、電視劇及電影。憑處女導演作《不得鳥小姐》橫掃各大獎項的女導演Greta Gerwig將名著改篇，加入新元素及新拍法，完美活化經典名著。分別由Emma Watson、Saoirse Ronan、Florence Pugh及Eliza Scanlen飾演March家四姊妹，加上靚仔到癲的Timothée Chalamet及Meryl Streep，一套好靚好溫馨的親情加愛情故事，唔婆媽無說教睇得好爽。(上映中)撰文:廖思慧
在爛番茄影評網站，《小婦人》獲得95%好評，觀眾大讚導演改編功力強勁。日前公佈的奧斯卡入圍名單，電影就獲得最佳影片、最佳女主角、最佳女配角、最佳改編劇本、最佳原創音樂及最佳服裝設計六大提名，非常厲害。
選角很好
《小婦人》講述美國南北戰爭時期，March家四姊妹的故事。大家姐Meg(Emma Watson飾)唔介意捱窮都要愛情、愛寫作的二妹Jo(Saoirse Ronan)過份有思想及獨立，完全生錯世代、三妹Beth(Eliza Scanlen飾)音樂造詣高又善良，至於最細的Amy(Florence Pugh飾)最愛繪畫，從小暗戀Laurie(Timothée Chalamet飾)。Timothée演繹Laurie非常適合，鬼馬又機靈，最緊要夠俊，出場後我眼中只有佢。對於改編名著，導演強調因為好鍾意Jo。「佢係我渴望成為嘅人，我從佢身上見到自己，所以一直都希望有一日能以呢個人物去創作一啲嘢。當我知道有人想開拍新嘅《小婦人》，我立即撲出去講出我對呢本書嘅獨特睇法及拍攝意念，呢啲喺原著作者Louisa May Alcott筆下一直未被拍出嚟」。