娛圈單打︱失驚無神打大風　留喺屋企睇戀綜

這班單身極品，個個都有性格缺陷。（Netflix圖片）

埋嚟睇，埋嚟揀。Netflix最新戀綜《母胎單身戀愛大作戰》全球大熱，進佔節目排行榜三甲位置。唓，咪又係配對節目，有咩特別喎？今次最特別之處，就係搵嚟一班情場初哥、從未出Pool嘅A0，為佢哋配對脫單。個個硬係有啲性格缺陷，過程有搞笑有尷尬，有青澀有笨拙，令人意想不到。

即係咁，韓國戀綜都出晒名㗎啦，好似《單身即地獄》，搵一班型男索女互Flirt，香艷養眼。但《母胎單身》係另一種玩法，參加者個個都係「母胎單身」，呆頭呆腦，出世至今未拍過拖。嚟到廿六七歲嘅關口，擔心繼續落去會孤獨一生，於是的起心肝參加節目搵對象。據報節目組從數千名參加者之中挑選12人，個個都係極品。

經過4位導師改造，變身靚仔靚女，例如原本宅到不得了、講嘢細細聲、完全不敢跟人直視嘅毒男，執完個殼竟然變成韓系花美男，成個任時完咁款；又有韓版唐詩詠、韓版宇宙G.E.M.、細粒版陳瀅等，絕對令人睇得舒服。

之但係執到個殼，執唔到個格，一班仔嘅言行反應尤其令人嘆為觀止，難怪被網民形容為「憑實力單身」。本欄就覺得，喺玩到爛嘅戀綜入面，難得呢個節目玩出新意，令觀眾有追看動力。去年最爆嘅綜藝係《黑白大廚》，今年可能就係呢套啦！素人+母胎單身，令觀眾耳目一新！

講到尾，要成功出Pool，外表未必係首要，男仔最重要對答正常、少少幽默同細心；女仔則笑容可掬會大大加分。總的而言，呢檔節目女仔質素高於男仔，如果想睇女，都係唔錯嘅選擇，呵呵。

娛樂