張振朗吳業坤新劇拍出感情　敏感部位唔掂得

視帝張振朗在無綫劇《刑偵12》中飾演患有人格解離症的「刑凱」，與其次人格由吳業坤飾演的「阿賢」，因朝夕相對而培育出友情。日前張振朗在社交網分享片段，片中見他攤直在地上，化妝師則踎低身幫他補妝，日以繼夜的拍攝，令「視帝朗」都不行了，難怪他發文表示：「知唔知有咩人先會瞓喺度化妝？係拍嘢拍到好攰嘅人。」不少粉絲見圖也大表心痛，望他多多爭取時間休息，免捱壞身子。但吳業坤見好友攰到瞓街，不但未有問候，反而相當挑機留言「點解我咁輕鬆」，有網民即戥張振朗是體力擔當而肉赤，吳業坤才良心發現謂「咁諗番又幾辛苦」。

張振朗和吳業坤因劇結緣，更跟同劇飾演張振朗「第三人格」的樂隊Mr.成員黎澤恩（Ronny）成好兄弟，鏡頭外可以攬頭攬頸拍合照，只是朋友還朋友，「巴打」間亦有地方不可觸碰。近日無綫釋出劇集幕後花絮片，張振朗和吳業坤齊坐在梳化上時，見張振朗伸手想搭住吳業坤大髀，可是卻搭中好友的胯下部位，嚇到吳業坤露出天然呆，再一手捉住張振朗的手放回正確位置，不過已令全場工作人員笑到「趴街」。

東網網站 : https://on.cc/東網Facebook專頁 : https://www.facebook.com/onccnews/