黃博懶理受靶無意減肥　重踏啟德開騷執着追紅館夢

「女大魔王」黃博22歲參加內地歌唱節目《快樂女聲》，歌藝獲讚賞，可惜因外形被篩走。來港定居後，她做過不同工作，近年轉戰幕後製作，直至去年放手一試參加《中年好聲音3》並贏得冠軍，重啟歌唱夢。第一首單曲《有一種執着》是為她度身打造，屬於黃博的追夢故事，對於成為歌手兼有自己的歌，她心情相當平靜，沒有吐氣揚眉之感，她說：「後生可能會想被認可，依家只想做好每一件事。」

她將與8強參賽者重臨成名地啟德體藝館舉行《中年好聲音3有你有我》演唱會，直言夢想是在紅館開騷：「有歌手夢想嘅人，發夢都想有自己嘅個人演唱會，夢想當然係紅館。以前幻想喺台上唱歌，四周圍黑晒，見到閃閃吓嘅螢光棒，見到啲綠色出口標記，好有畫面，但唔會畀時限自己，一步一步行。」

過濾網上負評

由參賽一刻開始便要面對網民評論，黃博認為是每個藝人都要面對的一課，對於負評，她說：「如果係人身攻擊，我唔會睇，要學識過濾、消化，無論正負評都抱平常心。如果有建設性嘅意見，好似話我咬字唔好，下次會注意呢啲細節，幫到我演唱有進步。」

《中3》賽果也出現過爭議之聲，黃博相當接受，揚言不影響與劉洋及張與辰的感情。由《快樂女聲》到《中3》，她的身形也備受抨擊，她說：「唱好歌先，希望有個形象表現出嚟，但又唔會好刻意減肥，如果減肥影響到唱歌就唔想。」

東網網站 : https://on.cc/東網Facebook專頁 : https://www.facebook.com/onccnews/