余德丞拍廣告得3千蚊　唔想拍拖：我長期Available！

余德丞冇特別想拍拖。

藝人余德丞今日（4日）在中環出席銀行保險活動，曾在踢波期間突然休克暈倒的他，心臟一度停頓可謂與死神擦肩而過。已經康復的他被問到事發後可會加重保險？他說：「好彩屋企人有同我買保險，再加重就冇，身體出毛病之後，再加可能未必得，或者好貴，所以要未雨綢繆。」

離開無綫後余德丞工作多多，既做電台又為ViuTV拍節目及銀行廣告，他說：「未入行前都拍過呢間銀行廣告，嗰陣仲讀緊大學，廣告費都係得3千蚊，依家就當然有加人工，數字就唔講喇。」他透露正為ViuTV拍攝有關戀愛的綜藝節目，自言稱不上是專家，但會透過分析教追女仔。

講到現時的感情狀況，他說：「我長期Available，又冇特別想拍拖，可能已經過咗想拍拖嘅年齡，自己又係處女座比較自我中心，做嘢為先，亦冇遇到啱，遇到最啱就係嘟嘟姐（鄭裕玲），只係講笑。」

娛樂