《女神配對計劃》七夕放閃 葉蒨文曾展望情侶照掀熱話

無綫戀愛真人騷《女神配對計劃》將於9月8至12日進入新章節《女神配對計劃 最後告白》，「最終章」則將於9月14日播出。5位女神葉蒨文（Sophie）、李芷晴（Stephanie）、關嘉敏（Carman）、羅毓儀（Yuki）、梁敏巧（Maggie）與12位求愛勇者及踢館者趁七夕「放閃」，以甜度爆表的情侶照及深情Caption掀起網上熱話。其中曾展望（GM）與Sophie憑一組「學生情侶風」照片再度成為焦點，更有眼利網民翻出台慶片段，指Sophie曾親手為GM整理領結。

GM雖然在社交網只以一句「祝大家七夕快樂」簡單帶過，但連環上載與Sophie的甜蜜互動照，加上Sophie眼神流露愛意，節日氣氛瞬間拉滿。另一邊廂，林俊其（Kris）則以詩意Caption「如果… 2019 11.25初次遇見 20250406再次遇見 2025…」展現浪漫心思，他更是唯一一位公開分享與Yuki合照的勇者，引發配對猜測。黃建東笑言：「其哥今時唔同往日（暗似脫單）~好戥佢開心添~」，徐文浩則搞笑回應：「唉，Kris要離棄我了。」Sophie亦幽默爆料，指Yuki與Kris在現場「掛住影相」。

劉啟進（Matt）被譽為節目中的「暖男擔當」，他在社交網貼出與Maggie的「童年照拼圖」，並寫下深情Caption「雖然遲咗咁多年先見，但總算遠距離同你一齊蹺腳同黑過面，同埋陪你感受過一齊著校服嘅日子，七夕快樂」。雖然語氣冧爆，Maggie卻笑言「你做乜偷偷save我story入面嘅小朋友相」，Matt妙語回應：「乜咁啱嘅咩，細細個都係攞同款甫士、用同款梳化嘅咩。」陳衍丞（Kenneth）以「食字Gag」向Stephanie示愛：「為你『芷晴』～傾我至『丞』happy happy。」Stephanie笑言：「啲歌詞笑死我。」

（即時娛樂）