香港估估吓：呢把係乜嘢神奇兵器？

港漫《神兵玄奇》係香港漫畫宗師黃玉郎1999年出版嘅漫畫作品，當中故事圍繞住具有不同異能嘅神奇兵器，由於漫畫推出初期隨書附送袖珍型神兵開信刀精品，創出一股神兵熱潮，好多漫畫作品都隨之而有樣學樣。而《神兵玄奇》中嘅神兵設計都各具特色，所以不論係附送嘅精品，或者係獨立發售嘅神兵都成為漫畫迷熱捧嘅收藏品之一。

提到《神兵玄奇》，相信大家會記得男主角南宮問天嘅神兵「天晶」，不過不能忘記嘅當然仲有能夠另一把神兵「虎魄」刀啦！所謂「虎魄重光，天地稱王」，《神兵玄奇》故事初段就以群雄爭奪「虎魄」刀為主。「虎魄」刀嘅出現就要由蚩尤同黃帝大戰講起，當時蚩尤與黃帝大戰卻節節敗退，後來就遇到一隻天外異妖，更知道若然將之煉製為兵器必然威力無窮，遂以生人餵之。及後，蚩尤想將異妖煉制之時，異妖企圖反噬，而蚩尤嘅忠心寵物戰虎於危急時將異妖吞噬，但係蚩尤為求神兵而硬生生打死戰虎想將異妖取出，其時異妖已經同戰虎連為一體，從而被蚩尤將之煉成被稱為最邪惡兵器，具有吸取中刀者精元以增強持刀者體能和功力嘅「虎魄」刀。