《梨泰院Class》兩版主角同場！袁澧林苦練韓文接近朴敘俊被柴台

有國際品牌今晚於尖沙咀舉行活動，邀來韓星朴敘俊、台灣男神陳柏霖及香港型男陳偉霆站台亮相，吸引大批粉絲現身追星，場面墟冚，尤其朴敘俊現身時，尖叫聲此起彼落。3人雖然未有受訪，但相當識做，拍照後即向在場圍觀途人派心心及揮手打招呼，而陳柏霖更向人群送飛吻，表現風騷。

另外，鍾雪瑩及袁澧林齊齊做訪問。談到收藏品牌飾物，鍾雪瑩搞笑說：「攞獎我都只係帶自己去餐廳食番餐咋！」袁澧林即接着說：「我就比較鍾意買頸鏈，仲會買埋個袋出trip用，可以作唔同嘅配搭嘛。」鍾雪瑩又透露自己已入組拍電影，今天早上才收工：「估唔到嚟到現場見番啲同事，大家相視而笑。」

至於近期大部分時間留守台灣發展的袁澧林，去年拍攝了由韓劇《梨泰院Class》改編而成的台劇《來！金來號！》，不過至今仍未上映，當得悉原裝男主角朴敘俊今晚會同場，她即興奮苦練韓文，打算自我介紹及告訴對方自己是台版的女主角，可惜卻遭懂韓文的鍾雪瑩狠批「講得好爛」，故到場後只保留幾句與朴敘俊打招呼，及順勢集郵。當被問到是否想與對方合作，她即答說：「當然想，唔會有講No嘅可能。（零片酬都肯？）我拍戲從來唔係講錢嘅，呢個好多人都知。」

日前與女友Christy簽字結婚、榮升人夫的歌手Tyson Yoshi亦有現身，甫到場即獲現場粉絲大叫「人夫」並送上祝福，Tyson Yoshi手上未有佩戴婚戒，他直言：「戴就得罪老細，唔戴就得罪老婆，但老婆易搞啲。」

Tyson Yoshi之結婚登記儀式在家中進行，至於簽字時會否很緊張，他笑言：「冇，緊張嘅話就應該係一時衝動。（有冇眼濕濕？）可能太早啦，因為師傅話吉時係早上9點前，冇時間諗啲咁嘅嘢，反而夜晚同親戚食完飯返到屋企，坐喺度嘅時候就感覺到自己已經結咗婚。」

Tyson Yoshi還笑言跟親戚食飯時，個個就大魚大肉，自己為了下月舉行的演唱會以及歐洲婚禮而忍口，只能吃雞胸Keep Fit。談到婚後是否已全力造人中？他表示：「等埋演唱會先，太太覺得下年嘅生肖都唔錯，想生個屬馬嘅BB。（咁如果佢覺得十二生肖都好好呢？）嘩，冇錢呀，7人車都裝唔晒！」

提到獲品牌邀請落場試車，他笑言一點也不似開工，仲想試多兩圈，問他婚後是否會安全至上？他謂：「BB出世前，會玩埋先，出世後要賣車，換BB車。」下月於歐洲舉行婚禮的他，有指好友林家謙以要開騷為由拒絕邀請，不會到歐洲觀禮，但對方是8月開騷，理應沒有太大關係，Tyson Yoshi則為好友解圍：「可能佢身子弱，明白嘅。」他還指兄弟團沒有圈中人，大家畀面到來Enjoy便好。

同場有歌手馮允謙，之前於港台頒獎禮奪獎時坦言想攞假休息的他，笑言已正經攞假，就快飛去旅行，但只可以快閃，因要趕返港工作，他謂：「因為7月會有音樂會《甚麼是喜劇》，主要唱歌，但會加入喜劇形式，音樂總監Edward Chan（陳浩然）都話我有喜感。」他又表示知道同場的Tyson Yoshi已結婚，之前曾表示希望2026年跟女友結婚的他坦言會向他取經，自己則會考慮海外婚禮，因為家人都主要在外地，又謂：「我自己冇所謂，主要睇女朋友意向。」

東網網站 : https://on.cc/東網Facebook專頁 : https://www.facebook.com/onccnews/