蔡卓妍自爆初戀經歷　人生第一次發生喺中三

藝人蔡卓妍（阿Sa），近年愛上打Tennis嘅佢，不時透過社交網分享練習心得，而日前落雨都喺球場練波嘅佢，被林德信大讚對網球充滿熱情：「落雨都照打波！」之餘，當被問到可唔可以分享初戀故事時，阿Sa更直言人生第一次初戀係喺中三，參加聖誕舞會嘅時候認識到對方：「人生第一次初戀就係我中三嘅時候，學校嗰啲Joint School嘅Christmas event，派咗一隊跳舞好勁嘅group，咁就去嗰間男校嗰度表演，咁我就係去做打雜嘅，即係我唔係做跳舞嗰啲，就喺嗰度就識咗我第一個初戀男友囉！」

阿Sa隨後表示，可惜初戀因為移民英國關係，所以呢段遠距離關係僅維持咗2年時間，並分享到2人如何浪漫維持感情，直言因為細個冇乜經濟能力嘅關係，禮物都係自己DIY製作：「買咗個玻璃罌，跟住裏面全部整晒啲朱古力豆啦，砌咗啲字咁樣。」最後更怕醜道：「砌咩字我諗你估到㗎啦！」認真可愛！

東網網站 : https://on.cc/東網Facebook專頁 : https://www.facebook.com/onccnews/