【香港估估吓】星爺喺《生命之旅》嘅角色叫乜名？

1987年8月24日，大台推出長篇時裝恩仇劇《生命之旅》，睇番演出陣容真係好強勁，像第一男主角係金馬獎影帝萬梓良，飾演大奸角嘅吳鎮宇亦係金馬獎影帝，而第一女主角則由金像獎影后鄭裕玲擔任，同劇仲有大量老戲骨參演，包括曾江、關海山、李香琴、吳孟達、劉兆銘、譚炳文、楊澤霖、蘇杏璇、南紅等等。

此外，當年剛剛離開《430穿梭機》嘅星爺周星馳，亦有份演出，劇中嘅名字仲同三國時代一位著名武將一樣添，你知道叫乜名嗎？

答案係趙子龍，又叫阿龍，係主角沈志豪（萬梓良飾演）嘅助手兼好兄弟，算係星爺加入劇組後第一個比較突出嘅角色。值得一提，呢套劇係星爺同萬梓良首次合演嘅電視劇，二人响兩年後播出嘅《他來自江湖》再度合作，後者更成為大台嘅經典劇。

東網網站 : https://on.cc/

東網Facebook專頁 : https://www.facebook.com/onccnews/