娛圈單打︱齋摷冇做好唔抵　玩謝條仔真濕滯

喂，都話明日花下死，做鬼也風流，之不過，風流鬼明明大好前途，梗係唔想咁快死啦！呢，韓團THE BOYZ成員周鶴年，因為被踢爆密會前AV女神明日花綺羅兼進行性交易，即時被公司解約踢出團。事件有新發展，有人堅稱同綺羅「齋摷冇做」，怒轟公司解約無理，仲話要反告到底喎！

綺羅姐亦唔係省油的燈，潛水數日終於喺社交網發文，跟鶴年口徑一致，拒認收錢發生性關係，堅稱從來冇賣淫，仲話當晚除鶴年外，酒吧仲有一班人，當中包括一位勁冧鶴年嘅女性，懷疑佢唔抵得自己同鶴年好，於是胡亂向傳媒爆料砌生豬肉。嘩，好清高呀，咁講法，佢哋兩位咪冤過竇娥冤？

嗱，網上又流傳另一版本，有人因為成功同「所有男人嘅偶像」爆房，視為廿幾歲仔以來最大成就，周圍爆響口吹噓，連畀幾多錢約炮都爆埋出嚟，因此傳出綺羅姐收21萬港元任砌4粒鐘嘅小道消息。有人高調成咁，於是乎，公司果斷割席，以免連累其他成員。

講嚟講去，咪就係色字頭上一把刀囉。身為當紮年輕偶像，爛玩爛蒲唔緊要，但寧畀人知，莫畀人見，家陣女粉絲知道偶像原來深好此道，咩嘢幻想都冇晒，公司仲點可能畀你留低吖？仲話要反告喎，傻仔，點告？莫講話你食咗個AV女優啦，好似NewJeans正正經經一班女仔，只係不滿被原公司「剝削」而反枱，到家陣都冇得返出嚟。小明星難與大公司鬥，有辦你睇。

話又說回頭，26歲嘅韓流偶像，因為36歲嘅綺羅姐而收皮，前AV暗黑女神食仔戰績又添一筆，都咪話唔巴閉！

東網網站 : https://on.cc/東網Facebook專頁 : https://www.facebook.com/onccnews/