193傳遭雪藏生日會爆喊　粉絲以行動力撐

男圑ERROR成員193（郭嘉駿）於1月14日牛一，而昨日（25號）其粉絲為他舉行補祝36歲生日會，約300粉絲以行動支持傳遭公司雪藏的他，更請得193偶像少爺占擔任主持，而少爺占為賀生日亦送上一本相當應景的書籍《剛剛好的任性》。

生日會上他演唱了兩首歌，努力擠出笑容和粉絲互動，切蛋糕又許願，一向招積、牙擦的他獻唱由自己親自填詞，多謝粉絲的《越州公路193》時，情緒大爆發，喊足逾半首歌，一度要背向粉絲抹淚及平靜心情。唱完後，喊到眼鼻通紅兼鼻水直流的193表示：「呢首歌以後列為禁歌，上次唱呢首歌有幾兄弟喺度，分擔咗（情緒），我冇咁投入，呢首歌真係送畀大家，因為…（台下大叫我愛你），多謝你哋呢兩、三年，我冇嘢講。」台下有不少粉絲都跟住他喊。而會後，歌迷會留言話：「我嘅願望只有一個，只要33你開心」，仲話「猶幸耳筒內，全是你的鼓舞」，而33亦轉發貼文，感性以《越州公路193》歌詞「沿途還有你，便有樂土」回應。

東網網站 : https://on.cc/東網Facebook專頁 : https://www.facebook.com/onccnews/