任賢齊愛女索爆探班鬧笑話　網友驚問：20歲咁嘅樣？

台灣天王任賢齊2002年娶大學學妹陳則妤（Tina），婚後誕下一子一女，大女Rati現已20歲，細仔Cody亦已17歲。近日任賢齊嘅「任學長」雕像於深圳鑄成，佢親自現身打卡，估唔到Tina同Rati都有現身，並被眼利網民成功捕獲。

有網民發帖並上載3張照片，其中兩張均見到一對母女同一名男子傾談，原來呢對母女正係Tina同Rati。已經55歲嘅Tina保養得宜，染上一頭短金髮十分矚目，一件白色背心襯流鬚皮背心，加上短裙及紅色厚底鞋，非常吸睛。反而青春迫人嘅Rati，只着上簡單貼身白色Tee及闊身牛仔褲，不過配上精緻五官及烏黑長直髮，輕易成為路人焦點。

網友大讚Rati素顏出行，一啲都唔輸比大明星，不過最搞笑嘅係合照一公開，竟然有唔同網友認錯Tina係任賢齊愛女，更留言問：「二十歲就染黃頭髮啊？」，仲話佢個樣略顯老，粉絲即糾正錯誤，指黑頭髮嘅先係Rati，着短裙嘅係「齊嫂」。

東網網站 : https://on.cc/東網Facebook專頁 : https://www.facebook.com/onccnews/