商台DJ泰山患前列腺癌四期　癌細胞擴散至骨：我係咪就咁玩完？

商台DJ泰山（本名曾匡民）除在電台開咪，同時亦主持電視節目、配音，亦在其YouTube頻道「泰山自煮」拍片教煮嘢食。不過早前工作量忽然大減，原來今年初確診患上前列腺癌第四期，發現時已擴散至其他部位，包括盆骨、頭骨、胸骨、膊頭、尾龍骨，須即時打賀爾蒙針和服食標靶藥。

泰山昨晚（7月22日）在社交平台發片，他在片中透露，於去年12月時發現小便不太暢順，於是睇醫生做檢測，經一輪檢查後發現其「前列腺好硬」，於是馬上安排驗血和電腦掃瞄，已經看到有個影，證實他患上前列腺癌第四期，「亦已擴散到骨頭」。

泰山於1月尾開始接受荷爾蒙治療和服食標靶藥。2月初開始做化療，同時打賀爾蒙針和服食標靶藥。每3星期一次，直至5月底完成6次，其後再進行10次電療。「成個6月都喺度做電療，真係拍唔到片，因為隔一、兩日就做，做完電療好攰。」直至7月初轉至腫瘤專科中醫診所，嘗試清除餘下癌細胞。

泰山表示，完成6次化療後，「90%癌細胞已經走晒」，而反映前列腺癌細胞指數的PSA level由最初確診時的57，跌至現時0.8，而正常男士的指數是4或以下。他表示非常感恩，亦會繼續努力。泰山回想當時確診患上前列腺癌第四期，他曾對自己說：「我係咪就咁玩完？」太太最初亦無法相信，當時首個反應是：「我第一個感覺係睇唔到自己細路大，唔可以同泰嫂一齊老落去」，很擔心沒有人教自己的細路。他直言當時很害怕，但很快就接受自己得到癌症，想辦法如何處理，以及作最壞打算。

泰山透露，最初接受化療時已準備好會很辛苦，幸好6次化療都沒有嘔過，很感恩沒有太大痛楚、皮膚亦沒有太大損傷，「這半年的治療很安穩，沒有特別的副作用」。現時接受中醫治療的泰山，慢慢開始恢復精神，需要較長時間去調理。他透露，現時仍要定時服藥和檢查，「而家可以叫做被控制之下，與剩餘、瞓著咗嘅癌細胞一齊共存。」他表示需要健康飲食、少食糖、多做運動，笑言叫大家提醒他多做運動。他最後呼籲病友不要太早放棄，要保持樂觀心態，因為他遇過很多醫生都表示一定要保持心情好，「以佢哋嘅經驗，心情唔好嘅病人，病情轉差嘅機會大好多。」由最初確診時很害怕，到現在有很好的治療效果，泰山表示：「好似畀咗一個新生命畀我」。現在的他盡量保持正能量：「老土都要講，活好每一日，個人放鬆啲、脾氣少啲、大方啲，原諒人多啲、笑多啲、陪屋企人多啲，畀啲耐性身邊所有人。」泰山再鼓勵其他病友：「如果個腦知道唔放棄，身體都會唔放棄」。