林正峰被爆背游嘉欣出軌 急澄清與劉溫馨不熟：世途險惡

28歲無綫上位小生林正峰今年3月宣布同拍拖三年的圈外女友分手後，好快就傳出秘密搭上22歲「A0女神」游嘉欣，二人又肆無忌憚咁同遊大澳、看展覽及踩單車，林正峰更疑似公開表白：「最好嘅可能就喺身邊呢！」雖然二人一直未有公開承認戀情，不過都似乎是公開的秘密，至今已經拍拖半年。

但近日林正峰就被爆疑似背住女友游嘉欣偷嗒31歲小花劉溫馨！有傳媒影到日前林正峰同劉溫馨在土瓜灣撐枱腳，估計是為林正峰慶祝28歲生日，女方仲以一條「戰鬥格」大露背連身短裙現身，大曬玉背和美腿。據知二人約會時林正峰不避嫌為劉溫馨披上自己的外套，又主動為她切食物、整理頭髮以免沾到食物，更分享手機照片給女方，關係非比尋常，之後二人又一起吃生日蛋糕。而劉溫馨早前已被發現在旺角挑選男裝內褲，似乎正在準備林正峰的生日禮物。事發後林正峰就很快在IG跟劉溫馨割席：「八月份我生日的時候同很多友人都約食生日飯，而其中一位前輩提出約食生日飯，雖然平時甚少傾偈，但因為曾經合作過嘅前輩，所以就聚一聚出去食，食完飯之後我哋都冇同大家有任何聯絡。」又指劉溫馨之所以「戰鬥格」現身是因為食飯前剛完成記招。林正峰又強調同游嘉欣只是「好兄弟」，澄清自己現正單身。