配股集資手法最常見 熊大教你提防莊家陷阱

兔兔：熊大熊大，我N年前聽姨媽姑姐買落的細價股最近宣布要配股，不過我連配股係咩都未知。

熊大：哈哈！兔兔，你成日聽埋班姨媽姑姐的建議去買股票，通常蝕多過賺。投資最好自己做功課，唔係隨便聽人講買咩就買咩。

兔兔：知道了！上次你教過我咩係供股，配股同供股有咩分別？

熊大：一間公司要集資，普遍有兩種方法，上次我同你講的供股是其中一種，而配股就係另一種常見的集資方法。一間公司需要資金周轉，但唔想增加大股東與小股東的負擔，寧願大家一齊攤薄持股比例，引進新投資者，呢個情況就稱之為配股。配售的股份可以係新股，亦可以係舊股。

熊大繼續說：配售同供股最大的分別係，股東或散戶唔會牽涉喺配售的過程。佢地唔會成為配售的對象，其股東權益就會直接被攤薄。有時獲配股人士的身份基於某些情況下唔使公開，變相公司私底下可以將股份配畀邊個都得。相反，供股就要等股東自己選擇參與定唔參與，唔參與的話權益就會被攤薄。所以供股相對配股而言，對股東更加公平。

兔兔：如果獲配股人士的身份可以公開，咁喺邊度可以查閱？

熊大：港交所網站上的權益披露。只要獲配股人士有5%以上的股權就會顯示個名。如果想了解獲配股人士同間公司的股東有咩關係，再上網查就會略知一二。

兔兔：其實配股對股價係好事抑或係壞事？

熊大：一間正常做生意的公司，如果引入新技術、擴充業務，就一定需要資金，呢個時候宣布供股或配股，對公司前景可能係好。但最怕的是，間公司成日無端端配股或者供股，好似莊家玩財技，就會白白將股民的錢變成大股東或莊家的錢。

兔兔：咁配股後股價通常升抑或跌？

熊大：要睇番係折讓配股，抑或係溢價配股。不過通常係間公司等錢使先至會以「折讓價」配股引入新股東，呢種情況下當然係利淡股價。如果係股價低的時侯配股，就會攤薄現有股東權益。而大股東將自己的資產低價出讓，亦同樣攤薄其利益。不過低位配股的目的可能唔係純粹為了集資，而係將股份轉至「自己人」手中，變相可以大大提高大股東的股權集中度；如果股價升至高位的時候配股，表面上係籌募資金發展業務，實際上就有「抽水」之嫌，同時會令人覺得股票已經唔抵買。呢種情況下，股份都係少沾手為妙。

熊大繼續說：至於溢價配股，呢個情況比較少出現。原因係溢價配股反映兩種情況，一係大股東希望自己的持股量增加，令到其股份貨源歸邊；二係大股東認為公司現價估值被低估，溢價的配股水平先至係合理。如果真係溢價配股，現價距離配股價仍有段距離的話，投資者就可以坐順風車短炒一轉。

兔兔：熊大，聽你咁講，其實供股、配股都唔算一種好的集資手法。睇嚟投資真係要靠自己多做功課，唔好盲目跟隨、人買我買的心態。