張振朗曾窮到兩蚊凍飲唔敢加　視女友楊偲泳為護身符

視帝張振朗日前接受電台節目訪問，坦承入行至2015年主演《愛．回家》第二輯之後才開始有穩定收入，問到如何捱過初入行月入6千元的歲月，他說：「凌晨將軍澳收工最辛苦，要公司車去旺角轉紅van，再返到屯門仲要行好遠先至到屋企。起居飲食係唔夠，好記得當時沈震軒帶我食日本拉麵，我一望餐牌，咁貴點算？或者佢睇穿我，話：『我請你啦！』又有一次同朱敏瀚、樂彤一齊出去食嘢，又係見到菜單好貴，佢哋都係講咗一句『我請你啦！』係好記得呢啲畫面。當時連凍飲加兩蚊都唔夠膽，事關第二日食飯可能就係爭呢兩蚊。」

未有穩定收入時，振朗直認要靠家人支持：「阿媽阿哥都有，阿媽幫得最多。一定有唔好意思，都廿到尾大個仔。阿媽係無限量支持我，但都有階段問我需唔需要考慮將來轉行，但當佢知道我好想繼續演戲呢個諗法，都係繼續無條件支持我。因為冇人估到近5年我嘅轉變，所以都會擔心我，但起碼到今日，冇令阿媽失望。」

6年前振朗曾被封為「地獄黑仔王」，事因他接連5套主演劇臨播出街被抽起，拍劇亦多次受傷，當中甚至有兩次需即時送院急救，他直言難以忘記，當黑的他當時正在拍攝《反黑路人甲》：「嗰幾次受傷係好恐怖，嗰啲劇係朝早話播，到晏晝又唔播。嗰個階段，都會諗係個天覺得我唔啱呢行？好彩我樂觀，都會認為自己好彩！會諗如果啲劇當時播，或者會畀人鬧到反艇喎？嗰兩次嚴重意外，如果我真係黑仔，有可能瓜咗喎？個cam跌落嚟嗰次，有可能毀容喎？好彩只係中膞頭！令我知道凡事往好方面睇，好嘢自然會埋嚟。」

振朗與女友楊偲泳拍拖至今6年，由相戀至今二人事業齊有突破穩步上揚，就連振朗也認同與女友互相催旺事業：「我哋擺明運氣夾，直情係護身符咁，哈！」他指兩人關係穩定但不急於結婚：「我係好傳統嘅人，當然想會想做呢件事，依家關係好舒服，但要等多一陣，因為我同佢都衝刺緊。我哋係好Chill嗰種，突然之間聽日做都唔出奇。」他指入行至今的目標，仍是希望儲夠錢置業，買一間可以容納8個人同住的獨立屋與家人一起生活。

東網網站 : https://on.cc/東網Facebook專頁 : https://www.facebook.com/onccnews/