章子怡楊冪忽然破冰　約去上海食蛋糕力證冇不和

由國際影星章子怡、楊冪、趙麗穎主演嘅電影《醬園弄》由拍攝到官宣上映都話題十足，日前釋出海報時，眾星突破造型亦成熱話，當中章子怡爛面扮醜、楊冪亂髮零妝容、易烊千璽剃光頭等，不過都不及演員間嘅是非咁多人睇。去年眾人出戰康城影展，當時首映禮過後子怡傳質問導演刪剪佢某啲戲份而有所不滿，當時有指導演為平息趙麗穎同楊冪明爭暗鬥女二之名，增加二人角色出鏡率，間接犧牲女主角章子怡出場時間。

估唔到事隔一年，尋日（5日）楊冪上載咗一張靚靚蛋糕相，竟引得章子怡主動留言，表示要約對方去上海食Cake：「蛋糕🍰😭想起了我們的蛋糕[鮮花]上海咱們約蛋糕局🍰」楊冪亦秒回：「必須約」簡單留言，打破外界對二人不和嘅傳聞，力證友誼長存，不過二人IP地址則顯示同在北京，疑似稍後新片會於上海有宣傳活動。

東網網站 : https://on.cc/東網Facebook專頁 : https://www.facebook.com/onccnews/